200 euro dënim për babanë kosovar që nuk ia pagoi ish-gruas ushqimin e djalit

Dënimet e gjykatës që nuk po tejkalojnë shumën prej 250 eurosh po e lënë të pakënaqur viktimën e dhunës.

Gjykata Themelore në Prishtinë ka vendosur që ta dënojë në shumë prej 200 eurosh ish- bashkëshortin e viktimës për mospërfillje të aktgjykimit të gjykatës për afër 6 muaj, përmes së cilit detyrohej që të paguaj shumën prej 150 euro për ushqim të djalit të tyre.

“…të dëmtuarës ia ka rënduar gjendjen e përkujdesjes ndaj të birit të tyre pas zgjidhjes së martesës, të caktuar me vendimin e lartcekur”, thuhej në aktgjykimin e siguruar nga KALLXO.com.

Më herët, e njëjta gjykatë, ka dënuar ish- bashkëshortin e saj në shumë prej 250 euro pasi e kishte goditur me shuplakë gruan.

Në një vendim tjetër, gjykata e kishte dënuarin ish- kunatin e saj në shumë prej 200 euro pasi e kishte goditur atë në kokë.

Më 27 korrik të vitit 2017, Gjykata Themelore e Prishtinës kishte marrë vendimin që babai i fëmijës të paguajë 150 euro për muaj për ushqimin e tij.

Por, sipas viktimës, ai këtë shumë nuk e ka paguar edhe sot e kësaj dite.

Më 7 tetor të vitit 2017, kur KALLXO.com kishte kontaktuar babanë e tani 7 vjeçarit, i cili kishte thënë se arsyeja se pse nuk po paguan alimentacionin fëmijës është se “s’ka pare”.

Por, viktima thotë se ish- bashkëshorti i saj së bashku me familjen e tij kanë të ardhura të majme nga lokalet me qira të cilat i lëshojnë, por të njëjtit nuk po paguajnë për ushqimin e fëmijës.

Por, ajo çka po e shqetëson viktimën më së shumti është fakti se një ditë mund të mbetet pa kulm mbi kokë.

“Jam e rrahur dhe kam frikë se mos mbetem pa kulm mbi kokë”, thotë viktima.

Madje, këtë shqetësim e ka vërejtur edhe djali i saj 7 vjeçar.

“Po më thotë djali ‘mam pse na nuk kemi as shpi, as kurgjo’. Po më thotë ‘kur t’rritna mam du me ble ni shpi mos mu mërzit ti, me të bo me kesh’. Djalit po i thotë vjehrra që krejt jon sendet e mia, s’ki kurgjo ktu”.

Sipas pretendimeve të viktimës, paluajtshmëritë e ish- bashkëshortit të saj janë në emër të pronësisë së ish- vjehrrës dhe ish- kunatit, prandaj viktima frikësohet se mund të mos marrë kontributin e krijuar pas afër 10 vjet kurorë me bashkëshortin e saj, e të mos mbetet trashëgimi për të birin e tyre.

“Deri ma herët ky (ish- bashkëshorti) i ka ba kontratat me qiraxhinj, e qiraxhitë ja jepshin ktij paret. Sapo kemi hi n’gjyq e ka bo kishe mi shku paret në bankë të vllaut të tij a nanës, që me thonë se nuk ka pare”, thotë viktima.

Gjykata Themelore e Prishtinës kishte zgjidhur martesën në mes të viktimës dhe bashkëshortit të saj, por që kundër këtij aktgjykimi ka parashtruar ankesë vet viktima e dhunës, e cila në ankesë ka pretenduar se “nuk do ta zgjidhë kurorën pa e marrë hisen e djalit”.

“Si t’ ia ndajnë hisen djalit, pasaj e zgjidhim kurorën”, thotë viktima.

Janë këto rastet kur bashkëshortes i paraqiten problem pronësore më rastin e zgjidhjes së martesës me bashkëshortin, apo me rastin e vdekjes së këtij të fundit, si është rasti i Elhame Maqedoncit.

Nëse prona do të ishte regjistruar në emër të dy bashkëshortëve me rastin e lidhjes së martesës, mbase nuk do të përballeshin me gjithë këto procese gjyqësore.