17:23 / E Hënë, 16 Prill 2018

Deputeti i GDP-së deklarohet për çështjen e sigurisë ushqimore në Kosovë

Deputeti i Kuvendit nga radhët e Grupit të Deputetëve të Pavarurë, Driton Çaushi është deklaruar lidhur me çështjen e sigurisë ushqimore në Kosovë.

Ai ka thënë se do të ishte e pasaktë që rasti i mishit të importuar nga Belgjika të merrej si përshkruesi i duhur i gjendjes së rëndë të sigurisë ushqimore në Kosovë.

Sipas tij, për shkak se gjatë gjithë periudhës së pasluftës nuk kemi pasur për asnjë moment as edhe më të voglin kontroll mbi cilësinë dhe sigurinë e ushqimit që konsumojmë, transmeton Indeksonline.

“Produktet që përfundojnë në tryezat tona, si nga importi por edhe ato të prodhuara në Kosovë nuk i nënshtrohen asnjë kontrolli serioz për toksina, pesticide, metale të rënda, antibiotikë, hormone apo mbetje tjera me rrezik të lartë për shëndetin public”, ka shkruar ndër të tjerash Çaushi.

Postimi i plotë:

Deputetë të pranishëm,

Siq edhe jeni të njoftuar tanimë pjesë e agjendës të kësaj seance është edhe debati mbi sigurinë ushqimore dhe skandalet e mishit të importuar në Kosovë, kërkuar nga deputeti Sali Saliu dhe unë, si dhe deputetja Ganimete Musliu. Konsideroj se ky debat është tashmë i vonuar dhe duke pasur parasysh interpelancat e gjate që na presin mund edhe të mos i vije radha as gjatë kësaj jave.

E vlerësoj të vonuar për shkak se vendi për një kohë të gjatë gjendet në një situatë alarmante të sigurisë së shëndetit publik.

Do të ishte e pasakte që rasti i mishit të importuar nga Belgjika të merrej si përshkruesi i duhur i gjendjes së rëndë të sigurisë ushqimore në Kosovë. Kjo për shkak se gjatë gjithë periudhës së pasluftës nuk kemi pasur për asnjë moment as edhe më të voglin kontroll mbi cilësinë dhe sigurinë e ushqimit që konsumojmë.

Kjo në radhë të parë për shkak se një institucion që funksionon nën zyren e Kryeministrit ka dështuar totalisht në misioni i saj e i cili është (citoj) – Të mbrojë jetën dhe shëndetin e njerëzve duke siguruar nivel të lartë të sigurisë së ushqimit.

Fjala është pra për AUVK.

Vetëm disa ditë pas publikimit të skandalit të mishit të importuar nga Belgjika në disa qytete të Republikës së Kosovës u gjetën dhe konfiskuan nga inspektoriatet komunale tonelata të tëra mish me afat të skaduar dhe pa dokumentacion. Raste të tilla tani po bëhen gati të përditshme. Kjo tregon më së miri dështimin total të këtij Agjensioni në detyrën e tij.Kosova importon 40 mil kg mish në vit dhe a e dini sa është numri i mostrave që u testuan në Laboratorin e këtij Agjensioni gjatë vitit 2017? Vetëm 375. E ngjashme është situata edhe me qumështin dhe produktet e tij, vezët dhe peshkun e importuar. Mundemi vetëm të parmendojmë se cila mund të jetë siguria që kemi nga produktet nga importi.

Por, do të ishte gabim sikur ky të trajtohej si dështimi i vetëm i AUVK. Ky institucion ka dështuar në secilin aspekt që lidhet me përgjegjësitë e tij në sigurinë ushqimore.

Produktet që përfundojnë në tryezat tona, si nga importi por edhe ato të prodhuara në Kosovë nuk i nënshtrohen asnjë kontrolli serioz për toksina, pesticide, metale të rënda, antibiotikë, hormone apo mbetje tjera me rrezik të lartë për shëndetin publik.

Në therrtoret që funksionojnë në Kosovë nuk ka kurrëfarë kontrolli të therrjes së kafshëve, i cili është i domosdoshëm për parandalimin e transmetimit të sëmundjeve te njerëzit. Për më keq të gjitha mbetjet nga këto therrtore përfundojnë në deponi të mbeturinave, duke paraqitur burim permanent infeksioni direkt per qytetarët por edhe të ujërave nëntokësor. Kujtoj së është detyrë e AUV që të sigurohet që të gjitha këto mbetje të asgjesohen përmes djegjes.

Nuk ështe pra fare për tu quditur që kemi qytetarë në spitalet tona me sëmundje siq janë bruceloza, tuberkulozi, salmoneloza, ekinokokoza e sëmundje të tjera. Më duhet të theksoj që disa nga këto sëmundje në Evropën perëndimore janë të çrrënjosura ose dukuri shumë të rralla.

Është shokuese që deri më sot nuk ka pasur asnjë reagim nga kryeministri Haradinaj në përballje me këtë situatë. Njejtë e konsideroj edhe heshjen e Ministrit të shëndetësisë. Në cilin do vend normal kjo do të ishte situatë e jashtëzakonshe e sigurisë së shëndetit publik.

Konsideroj që hapi i parë dhe i domosdoshëm është shkarkimi i menjëhershëm i Kryeshefit dhe bordit menagjerial të AUV dhe nisja e hetimeve nga prokuroria për këtë institucion.

Ky agjension mund të jetë në shërbim të bizneseve siq janë importuesit e mëdhenj dhe pronarët e supermarketeve dhe partive në pushtet, por asnjëherë në shërbim të sigurisë dhe interesit të qytetarit të Republikës së Kosovës.