12:35 / E Hënë, 16 Prill 2018

Ethet e LDK-së

Paria e Lidhjes Demokratike të Kosovës, qenkan mbledhur para disa ditësh, për të marr një vendim, për të cilin sipas meje, ata vet nuk janë të përgatitur. Kryesia e saj pra, i paska ftuar partitë politike në vend që të mblidhen e ta caktojnë një datë për zgjedhje të parakohshme, edhe atë, sa më parë që të jetë e mundur. Parë nga prizmi i rrethanave të krijuara në vend, një proces i tillë, mbase është i nevojshëm, por a thua a janë të gatshme subjektet politike për këtë gjë, për më shumë, a është vet LDK-ja?

Disa nga to kanë nisur proceset zgjedhore brenda tyre, ndërsa kjo e fundit (LDK-ja), bazuar në rendin shtëpiak të saj, në këtë shteg nuk mund të kalojë deri në maj të vitit të ardhshëm. Isa Mustafa, kryetar aktual i këtij subjekti, siç e dimë, nuk është mirë me shëndet. Sëmundja e tij nuk do të duhej të ishte “motiv” për nisjen e procesit të brendshëm zgjedhor, ani çka që në esencë, motive ka pasur mjaft për t’ia filluar kësaj valleje, që nga momenti kur ai e pat humbur besimin në parlament, duke u rrëzuar nga posti i kryeministrit. Herën e fundit në zgjedhjet nacionale, propozimi i Avdullah Hotit si kandidat për kryeministër, nuk qe frytdhënës, pa çka që elektorati ende e shihte Mustafën si një garues potencial në këtë post. Prandaj po them se kryesia e LDK-së çështje emergjente do të duhej ta kishte procesin e brendshëm zgjedhor, duke mos bërë gabim e të mbrohen para opinionit me argumentin se ata e kanë afatin zgjedhor që e respektojnë. Mirë që e respektojnë, por rrethanat e krijuara sugjerojnë hapa të tjerë politikë. Për më shumë e sugjerojnë atë hapin i cili do të ndryshonte traditën e proceseve zgjedhore brenda partisë. Tash për tash, gjëja më e duhur do të ishte që kreu aktual i saj z. Mustafa, t’i hapte rrugë këtij procesi duke dhënë dorëheqje, duke i ftuar anëtarët e saj në unitet, si dhe për zgjedhje të lira brenda kësaj partie.

Se edhe brenda saj e dinë që kështu duhet të ndodhë, provë kemi shprehjen e vullnetit nga ana e Gazmend Muhaxherit për të qenë kandidat për kryeministër, që me automatizëm nënkupton edhe shprehje e vullnetit për të drejtuar edhe vet LDK-në. Jo vetëm kaq, edhe pretendentët e tjerë që po i mprehin ambiciet e tyre për këtë pozitë Agim Veliu e Lutfi Haziri, nga reagimet e tyre ndaj Muhaxherit, dëshmuan se e dinë që kështu duhet të ndodhë. Haziri për deklarimet e Muhaxherit ka thënë se ai: “…ka dhënë deklaratë politike si reagim ndaj zhvillimeve politike, sepse, LDK, ka kryetar dhe nuk e ka hapur procesin.”; kurse nënkryetari tjetër Agim Veliu për këtë ka thënë se: “Ende nuk është koha, ende është herët!”, duke shtuar me kurtuazi se “nuk është normale që njeriu i cili ka bërë një jetë në politik të mos ketë ambicie”.

Përfshirja e këtyre figurave politike të LDK-së në çështjen e zgjedhjes së kreut të ardhshëm të partisë janë prova më e mirë e asaj se kjo parti ka kohë që ka ngecur në tri këmbë dhe se i mungon koka.

Deklaratat e zyrtarëve na shpijnë në një lloj konkluzioni të atillë sa që, Agim Veliun, e nxjerrin pretendentin më serioz për të marrë timonin. Ai ka kohë që luan rolin e drejtuesit, faktorit kryesor brenda LDK-së, duke e ilustruar këtë edhe me deklaratat që ai s’është veçse një gardian i ruajtjes së saj. Roli i tij prej bariut të kujdesshëm që ruan kopenë në mënyrën më të mirë të mundshme, padyshim se është premisa që e sjellin atë si alternativën më të mirë për të qenë kryetar i ardhshëm i ish-partisë së presidentit Rugova. Veliu me shumëçka është më në avantazh kundrejt çdo kandidati tjetër për kreun e LDK-së brenda kësaj partie. Fitues “mitik” i të parit të komunës, fanatik i rugovizmit e mbi të gjitha parafytyrim i një LDK-je çfarë duhet të jetë.

LDK me kapacitetin aktual, nuk është e përgatitur për zgjedhje të parakohshme. Çdo kërkesë, çdo thirrje për një proces të tillë nga ana e saj, nuk ka sens. Ajo duhet ta zgjedhë kryetarin e saj të ri fillimisht. Pra LDK: Së pari zgjedhjet brenda partisë, pastaj zgjedhjet nacionale!

Shkruan: Albinot Maloku