Haradinaj uron shqiptarët e Maqedonisë: Zyrtarizimi i gjuhës shqipe hap madhor

Kryeministri i Kosovës, Ramush Haradinaj ka komentuar miratimin e Ligjit për përdorimin e gjuhës shqipe në Maqedoni.

Parmes një postimi në Facebook, Haradinaj ka thënë se ky është një hap madhor i realizimit të të drejtave të shqiptarëve dhe njëkohësisht i respektimit të vlerës qytetare në një shtet me synime demokratike, tranmeton Indeksonline.

Ky është postimi i tij:

Miratimi i Ligjit për përdorimin e gjuhës shqipe nga Kuvendi i Maqedonise është hap madhor i realizimit të të drejtave të shqiptarëve dhe njëkohësisht i respektimit të vlerës qytetare në një shtet me synime demokratike.

Ligji për përdorimin e gjuhës shqipe është përmbushje e obligimeve të Marrëveshjes së Ohrit dhe i respektimit të marrëveshjeve ndërkombëtare.

Vendimi i Kuvendit të Maqedonisë avancon marrëdhëniet ndërmjet komuniteteve që jetojnë në këtë shtet, nxitë zhvillimin demokratik të tij dhe i hapë perspektiven e vendit drejt integrimeve euro-atlantike. Me këtë vendim fillon një epokë e re në marrëdhëniet e brendshme të Maqedonisë dhe njëkohësisht edhe në rrugëtimin e gjithë rajonit drejt BE-së.

Uroj të gjithë bashkëkombësit tanë në Maqedoni për këtë akt kaq të madh legjitim që hapë perspektiven e tyre, si dhe shtetin maqedon për këtë hap të rëndësishëm për tërë rajonin.

RH