KFOR: FSK-ja, profesionale dhe multietnike

Në kohën kur po zhvillohet debati lidhur me transformimin e mundshëm të Forcës së Sigurisë së Kosovës (FSK) në ushtri të Kosovës, drejtues të KFOR-it e kanë vlerësuar lart profesionalizmin e FSK-së në kryerjen e detyrave të tyre, shkruan sot Gazeta ‘Zëri’.

Megjithatë, zyrtarë të KFOR-it thonë se një transformim i tillë nuk është në kompetencë të tyre.

“Transformimi në një ushtri nuk i takon KFOR-it, por KFOR-i mbështet sigurinë e Kosovës  brenda mandatit të saj aktual, duke bashkëpunuar me FSK-në në drejtim të trajnimit të përbashkët. FSK-ja është një forcë profesionale dhe multietnike, që ka treguar aftësi të mëdha në kryerjen e detyrave të tyre aktuale. Progresi i arritur nga FSK-ja është një shembull i qartë i NATO-s, që ofron mbështetje për ndërtimin e kapaciteteve”, ka thënë për “Zërin” zëdhënësi i KFOR-it Vincenzo Grassos.

Megjithatë, sipas tij, KFOR-i vazhdon ta ndjekë nga afër debatin mbi të ardhmen e FSK-së, por struktura, mandati dhe misioni i FSK-së janë çështje e institucioneve lokale në përputhje me Kushtetutën dhe me procedurat e tyre.