Klinë, e vret nipin e mitur aksidentalisht me armë

Një fëmijë në Grabanicë të Klinës ka ndërruar jetë në mëngjesin e sotëm si pasojë e plagëve të marra nga një armë zjarri.

Loja me armë është kthyer në tragjedi, kur djali i dajës ka qëlluar nipin (djalin e hallës) me armën e familjes. I mituri është dërguar në spital pa shenja jete.

Rastin e ka konfirmuar Driton Rugova nga Policia e Kosovës. Ai tha se bëhet fjalë për një vrasje aksidentale.

“Mundem me konfirmu një vrasje aksidentale, në orën 10:22. Ne Emergjencën e Mjekësisë Familjare në Klinë, fëmija i mitur ka arritur pa shenja jete”, tha Rugova për Gazetën Express.

Burimet njoftojnë se djali i dajës së viktimës (adoleshent në vitin e parë në shkollë të mesme), duke luajtur me armë zjarri ka qëlluar aksidentalisht viktimën, i cili ishte nxënës i klasës së pestë.

Mësohet se viktima është nga fshati Berliq i komunës së Deçanit.

Ai ishte me nënën e tij për t’u përshëndetur me dajët pasi që babi i tij po përgatiste letrat për bashkim familjar jashtë Kosovës.

Policia po merret me rastin.