Në Rahovec vazhdon projekti për spërkatjen kundër rriqrave

Në kuadër të masave për luftimin dhe parandalimin e etheve hemorragjike krime kongo (EHKK), në Komunën e Rahovecit është duke vazhduar projekti për spërkatje e zonave kundër rriqrave.

Përmes një kumtese për media kjo komunë ka bërë të ditur se ecurinë e këtij projekti e ka parë sot nga afër në fshatin Polluzhë edhe Kryetari Smajl Latifi i shoqëruar nga nënkryetari Fatmir Iska, Samir Mustafa drejtor i Drejtorisë për Shëndetësi dhe Mirëqenie Sociale.

“Projekti për spërkatjen zonave kundër rriqrave në Komunën e Rahovecit, organizohet nga Drejtoria për Shëndetësi dhe Mirëqenie Sociale. Spërkatja e zonave endemike, do të vazhdoj sipas planit të hartuar sipas zonave, ku ka më shumë raste të regjistruara të thumbimeve nga rriqrat, gjatë këtij viti”, thuhet në njoftim, përcjell KosovaPress.

Zyrtarët komunal dhe ata të kompanisë që do të bëjnë spërkatjen e zonave kërkojnë bashkëpunim gjatë kohës sa janë duke e bërë spërkatjen e zonave të cilat janë paraparë të spërkaten kundër rriqrave.