Provat dhe dëshmitë për rastin Ivanoviq vijnë në Prishtinë

Drejtoria për Hetimin e Krimeve të Renda e Policisë së Kosovës është duke hetuar dhe ekzaminuar provat për vrasjen e politikanit serb të Kosovës, Oliver Ivanoviq.

Atentati ndaj ish-deputetit Ivanoviq cilësohet si “vrasje e rëndë”, ndaj edhe hetohet nga kjo drejtori. Por ky fakt i ka bërë kurioz mediat në Beograd.

Sajti i televizionit shtetëror të Serbisë, citon shefin rajonal të Policisë së Kosovës në Mitrovicë, Zeljko Bojiç, tu ketë thënë se në fazën e dytë të hetimeve të atentatit të së martës, provat dhe gjurmët tjera, bashkë me serverin e video-incizimeve dhe të gjitha materialet e marra në vendin e ngjarjes janë përcjellë për në Prishtinë.

Lidhur me vrasjen e Ivanoviqit, dje rreth orës 8 të mëngjesit, në rrugën “Sutjeska” në veri të Mitrovicës, Policia e Kosovës ka njoftuar se politikan serb është qëlluar gjashtë herë me armë zjarri të kalibrit 9X19 mm, nga persona të panjohur deri më tani.

Në vazhdën e hetimeve të deritashme Policia e Kosovës thotë se ka siguruar vendin e ngjarjes dhe ka procesuar shikimin e vendit të ngjarjes, ku janë mbledhur dëshmitë relevante për këtë rast.

“Tani jemi në proces të ekzaminimit kriminalistik të të gjitha dëshmive. Në veçanti janë duke u nxjerrë, analizuar dhe vlerësuar video-incizimet e marra nga kamerat e sigurisë, të cilat janë marrë në vendin e ngjarjes apo që ndërlidhen me vendin e ngjarjes, si dhe dëshmitë tjera materiale. Ekipi hetimor i përbërë nga zyrtarë të specializuar për këto raste, përfshirë zyrtarët e Hetimit të Krimeve të Rënda, ekipet e Forenzikës Qendrore, IT Forenzikës, zyrtarë të Inteligjencës, Drejtorisë për Bashkëpunim Ndërkombëtar, janë angazhuar maksimalisht në procesimin e të gjitha të dhënave që ndërlidhen me këtë rast”, ka njoftuar Policia e Kosovës.

Sipas Policisë, deri në këtë fazë janë intervistuar edhe disa dëshmitarë si dhe janë pranuar disa informacione përmes kanaleve të sigurta të komunikimit, të vendosura për këtë qëllim nga Policia e Kosovës.

Policia ka njoftuar se është kryer edhe obduksioni dhe tashmë ka nxjerrë rezultatet preliminare.

“Në kuadër të veprimeve hetimore është identifikuar një veturë e djegur, e tipit Opel Astra ngjyrë hiri, veturë e cila dyshohet të jetë e përfshirë në këtë rast. Gjithashtu kemi arritur të gjurmojmë në nivel vendi por edhe ndërkombëtar të dhënat lidhur me qarkullimin si dhe pronarin/poseduesin e kësaj veture”, thotë njoftimi i Policisë.