Sot Kuvendi i Malit të Zi voton për dërgimin e trupave ushtarake në Kosovë

Si pjesë e Aleancës më të Madhe ushtarake në botë – NATO, Mali i Zi e ka për obligim që të kontribuojë në dërgimin e trupave paqeruajtëse nëpër misione.

Kështu së shpejti në Kosovë mund të vijnë 40 anëtarë të forcave ushtarake të Malit të Zi në kuadër të KFOR-it, njofton Klan Kosova.

Sot Kuvendi i Malit të Zi do të mbajë seancën e radhës ku në rend të ditës është edhe pika për votimin e vendimit të këtyre trupave në Kosovë.

Sa i përket kësaj çështjeje ka pasur deklarime të ndryshme për dhe kundër në ditët e kaluara.

Ministri i Mbrojtjes së Malit të Zi, Predrag Boskoviq ka thënë se duke iu bashkuar NATO-së, kushtet për intensifikim të pranisë nëpër misione ndërkombëtare nënkuptojnë edhe besueshmëri në komunitetin ndërkombëtarë.

Dërgimin e këtyre trupave e kanë kundërshtuar disa prej zyrtarëve të partive opozitare atje, duke thënë se ajo është politikë kundër Serbisë.