“PriFilmFest” sjell sonte filmin ‘Kosova Calling’ në sheshin ‘Zahir Pajaziti’
Në kuadër të Festivalit Ndërkombëtar të Filmit “PriFilmFest”, sonte në sheshin ‘Zahir Pajaziti’ në kryeqytet do të shfaqet filmi ‘Kosova Calling’ i regjisorit Eki Rrahmani.
Pas hapjes së festivalit që mbrëmë u bë me filmin ‘T’padashtun’ të regjisorit Edon Rizvanolli, sot për adhuruesit e filmit me fillim prej orës 22:30 në kinemanë e hapur në shesh do të shfaqet filmi i metrazhit të gjatë ‘Kosova Calling’, producent i të cilit është Fisnik Ademi dhe skenarit Jeton Kulinxha, shkruan Indeksonline.
Filmi ‘Kosova Calling’, pasqyron jetën e një komuniteti në një fshat, bazuar në Çabër, të pas luftës në Kosovë. Këtu personazhet mundohen të gjejnë kuptim në rrethanat e reja në të cilat gjendën, si dhe si t’i tejkalojnë sfidat me të cilat ballafaqohen për çdo ditë, gjithmonë duke qenë të vetëdijshëm se i përkasin shekullit 21 dhe se janë në një kënd të Evropës bashkëkohore, por që ende qëndrojnë pothuajse të përjashtuar nga kornizat e ‘Fshatit Globa’.
Në këtë film luajnë aktorët: Çun Lajçi, Armond Morina, Fisnik Ademi, May-Linda Kosumovic, Valina Muqolli, Arbneshë Nixha, Luan Kryeziu, Kushtrim Sheremeti, Anisa Ismaili, Adrian Morina dhe Shkelzen Veseli.
Hyrja në kinemanë e hapur në sheshin sheshin ‘Zahir Pajaziti’ për të gjithë ata që dëshirojnë të shohin filmin ‘Kosovo Calling’, është falas. /Indeksonline/