Ymeri: Për mocion u dakorduam me partitë, por s`e lejoi Kadri Veseli

Deputeti i PSD-së, Visar Ymeri ka thënë kreu i Kuvendit, Kadri Veseli ka bërë sot dy shkelje në seancë. Sipas tij, ai nuk ia ka lejuar fjalën propozuesit dhe as nuk ka lejuar deputetët të vendosin për mocionin e dialogut.

Ymeri ka deklaruar se për këtë kishin marrëveshje me grupet parlamentare, por Veseli nuk e lejoi atë, transmeton Indeksonline.

Ai ka thënë se është jetike që të debatohet për dialogun dhe përfaqësimi joserioz të ndalet.

Lexoni komentin e tij të plotë:

Kryetari i Kuvendit, Kadri Veseli sot bëri shumë shkelje, së pari duke mos e vendosë këtë çështje në votim, së dyti duke kërkuar marrëveshje ndërmjet grupeve parlamentare. Por, edhe pas dakordimit tonë, që kjo çështje të hedhet në votim në seancën e re, ai këtë nuk e bëri. Ai i bëri sërish dy shkelje, nuk lejoi fjalën e propozuesit dhe as as nuk i lejoi deputetët të vendosin për mocionin.

Sot qartazi kishte interesim nga deputetët që të debatojmë për dilogun në Kuvendin e Republikës së Kosovës. Kështu edhe u dakorduam me të gjitha grupet parlamentare në fillim të seancës. Sidoqoftë Grupi parlamentar i PDK-së ndërruan mendje dhe kryetari i Kuvendit përkundër marrëveshjes në mes të grupeve parlamentare nuk e hodhi fare në votim mocionin. Kjo është shkelje procedurale.

Për më tepër se kaq, ky dialog dhe mësyerja e pakuptimtë për vazhdimin e tij pa legjitimitet demokratik nga Kuvendi e pa platform e strategji, e rrezikon seriozisht Republikën tonë.

Deri tash ky dialog, prej se ka filluar në vitin 2012 na e ka ndryshuar emrin politik nga Republika në fusnotë, na e ka fuqizuar e zyrtarizuar praninë politike të Serbisë në Kuvend e Qeveri përmes listës serbe, dhe së fundi rrezikoi të na e kthej me kokë te poshtë rendin kushtetues përmes Bashkësisë së komunave me shumicë serbe, për ta formalizuar ndarjen, e thelluar identifikimin etnik politikë në dëm të barazisë e drejtësisë qytetare, në dëm të integrimit të njerëzve e territorit, në dëm të përbashkimit e funksionalizimit të resurseve e tregut.

Është jashtëzakonisht e rëndësishme që të debatojmë në Kuvend për dialogun. Është tejet e rëndësishme që ky vazhdim i dialogut pa diskutim, pa legjitimitet, pa përfaqësim serioz e pa mbikëqyrje të ndalet. Është jetike për Kosovën që vendimmarrja të kthehet në Kuvend.

Qëndrimi i GP të PDK-së, se meqenëse një pjesë e opozitës po e bojkoton votimin në Kuvend, as PDK nuk do të votojnë nismat e opozitës është i pakuptimtë. Koalicioni qeverisës ka përgjegjësi karshi shtetit, e ve[anërisht karshi dialogut të cilin po e vazhdojnë. Këtë përgjegjësi ata duhet ta bartin ve[anërisht në Kuvendin e Republikës së Kosovës ku i japin llogari deputetëve e qytetarëve.

Ndërkohë që deputetët 58 e opozitës janë më shumë se të mjaftueshëm që ta thërrasim seancën e jashtëzakonshme për këtë debat. Jo për të mirën e PSD-së, por për interes të Kosovës.