Fshati Social, në Gjilan, me kosto prej 2.5 milonë dollarësh në prag të përfundimit

Fshati Social në Gjilan, i cili po ndërtohet me 12 objekte përcjellëse dhe me standarde të larta, donacion nga shteti i Kuvajtit, është në prag të përfundimit.

Lajmi u bë i ditur pas vizitës së drejtorit për Ballkanin të Komitetit për Evropë dhe Amerikë, Mahmud al Nexhdi, ku së bashku me drejtorët komunalë, Selami Xhemaili, Naser Korça e Bekim Bajrami, kanë parë nga afër implementimin e këtij projekti, i cili ka kosto prej 2.5 milionë dollarësh.

Drejtori i Shëndetësisë dhe Mirëqenies Sociale, Selami Xhemaili, ka konfirmuar se deri tashti është implmentuar 80 për qind e këtij projekti gjigant, ndërkaq që pritet të përfundojë në fillim të vitit të ardshëm. Ai tha se si Komunë e Gjilanit, ashtu siç i janë përgjigjur obligimeve të marrëveshjes për dhënien e pronës, do t’i marrin edhe përgjegjësitë e menaxhimit të Fshatit Social në mënyrën më të mirë.

Drejtori për Ballkanin i Komitetit për Evropë dhe Amerikë, Mahmud al Nexhdi, e ka falënderuar kryearin Haziri dhe drejtorët komunalë për bashkëpunimin dhe mundësinë e ofruar për investime në përfundimin e këtij projekti të jashtëzakonshëm.

Ai ka shfaqur shpresën se pas përfundimit të këtij projekti, menaxhimi atje do të jetë në nivel të lartë, për të gjitha kategoritë që bajnojnë dhe për stafin.

Ndryshe, guri themeltar i Fshatit Social është vënë në shtatorin e vitit 2018, ndërsa do të strehohen fëmijët jetimë, pleqtë e nënat pa përkujdejse.

12 objektet e Fshatit Social janë ndërtuar me krejt infrastrukturën për rehabilitim, shkollim, pushim, rekreacion dhe për lutje fetare. /Indeksonline/