Category: Tech

Probleme teknike janë raportuar nga përdoruesit e rrjetit social Facebook, gjithandej botës.

Përdoruesit kanë raportuar se rrjeti social ka ngecur së funksionuari, duke mos pranuar komanda dhe duke pasur probleme madhore në shfletim, shkruan IndeksOnline.

Kjo është hera e dytë brenda një periudhe të shkurtër që, gjiganti i krijuar nga Zuckerberg, ka telashe.

Edhe Instagrami pati probleme të njëjta, dy javë më parë, bashkë me Facebook.

Mark Zuckerberg ka njoftuar se kompania e tij, META ka lansuar syzet e reja. Modelet e syzeve janë dizejnuar nga Kylie Jenner.

“Linja jonë e re e syzeve Meta është në dispozicion sot. Tre forma, 26 kombinime stilesh, me Meta AI-në tonë më të përparuar të integruar. Plus, tre stile të personalizuara të dizenjuara nga Kylie Jenner” thuhet në njoftim./Indeksonline/

Mark Zuckerberg sapo ka njoftuar se Will Cathcart po largohet nga posti i kreut të WhatsApp pas 7 vitesh në krye të aplikacionit.

Vendin e tij do ta zë një indian, Kunal Shah.

“Will ka qenë një nga udhëheqësit më të rëndësishëm dhe efektivë të Metës, duke ndihmuar në sjelljen e ëhatsApp te mbi 3 miliardë njerëz dhe duke mbrojtur privatësinë për komunitetin tonë. Jam shumë mirënjohës për partneritetin dhe kontributet e tij gjatë këtyre viteve. Will po kalon në një rol të ri brenda Metës, ku do të ndërtojë produkte të reja nga themelet — jam i emocionuar që të vazhdoj të punojmë ngushtë së bashku.

Kunal Shah do t’i bashkohet Metës si udhëheqësi i ardhshëm i WhatsApp. Kunal e shndërroi CRED në një nga kompanitë më të rëndësishme të teknologjisë në Indi dhe ai sjell llojin e mentalitetit të ndërtuesit dhe perspektivën globale që do t’i shërbejë mirë në drejtimin e aplikacionit më të madh të mesazheve në botë. Pres me padurim të punoj me Kunal për të vazhduar ta bëjmë WhatsApp shërbimin më të mirë për miliarda njerëz dhe miliona biznese” thuhet në njoftim./Indeksonline/

Norvegjia ka vendosur një ndalim thuajse të plotë të përdorimit të mjeteve të inteligjencës artificiale gjeneruese nga nxënësit e shkollave fillore, ndërsa do të kufizojë përdorimin e tyre edhe në arsimin e fëmijëve më të rritur, me qëllim shmangien e ndikimeve negative në procesin mësimor.

Kryeministri i Norvegjisë, Jonas Gahr Store, deklaroi se vendimi vjen në një kohë kur vendi po përballet me rënie të rezultateve në testet arsimore. Sipas tij, përdorimi i inteligjencës artificiale mund të bëjë që fëmijët të anashkalojnë hapa të rëndësishëm në procesin e të nxënit, shkruan abcnews.al.

“Gjëja më e rëndësishme në shkollë është që fëmijët tanë të mësojnë të lexojnë, të shkruajnë dhe të bëjnë matematikë”, u shpreh ai, duke theksuar se rregullat e reja do të hyjnë në fuqi nga viti i ri shkollor në fund të muajit gusht.

Sipas vendimit të qeverisë, nxënësit nga klasa e parë deri në të shtatën, të moshës 6 deri në 13 vjeç, në përgjithësi nuk duhet të përdorin mjete të inteligjencës artificiale. Ndërsa nxënësit e shkollës së mesme të ulët, 14 deri në 16 vjeç, do të mund t’i përdorin këto mjete vetëm me kujdes dhe nën mbikëqyrjen e mësuesve.

Në arsimin e mesëm të lartë, nga 17 deri në 19 vjeç, nxënësit pritet të mësojnë përdorimin e duhur të inteligjencës artificiale, në mënyrë që të përgatiten për studime të mëtejshme dhe tregun e punës.

Norvegjia nisi përdorimin e gjerë të kompjuterëve në klasa në vitet ’90 dhe më pas tabletëve pas vitit 2010, duke ulur përdorimin e librave dhe shkrimit me dorë. Megjithatë, qeveria ka njoftuar gjithashtu se do të propozojë financim më të madh për librat shkollorë, duke synuar kthimin e tyre në qendër të mësimdhënies.

Më herët gjatë këtij viti, qeveria norvegjeze ka propozuar gjithashtu ndalimin e përdorimit të rrjeteve sociale për fëmijët nën moshën 16 vjeç, si pjesë e një qasjeje më të gjerë për të kufizuar ekspozimin e të rinjve ndaj teknologjisë digjitale.

Jeff Bezos doli në skenë në VivaTech në Paris për të argumentuar se njerëzimi duhet të shkojë në Hënë dhe përfundimisht më tej, jo vetëm për hir të eksplorimit, por për të shpëtuar planetin nga efektet e teknologjisë dhe industrisë.

Duke folur përkrah drejtorit ekzekutiv të Blue Origin, Dave Limp, në një sesion të moderuar nga ish-astronauti i NASA-s, Mike Massimino, themeluesi i Amazon dhe kryetari ekzekutiv i Blue Origin argumentoi se zhvendosja e industrisë së rëndë nga Toka është i vetmi skenar në të cilin rritja ekonomike dhe ruajtja e mjedisit mund të bashkëjetojnë.

“Planeti ynë mund të kthehet në gjendjen e tij para revolucionit industrial”, tha Bezos.

“Kjo është e vetmja mënyrë në të cilën bota është më keq sot sesa ishte 500 vjet më parë… Në fakt mund t’i kemi të dyja”, vazhdoi ai, duke theksuar se cilësia e jetës është përmirësuar për të gjithë njerëzimin, por se planeti vuajti si rezultat.

Mesazhi i tij ishte i qartë në lidhje me renditjen, domethënë se Hëna vjen para Marsit, dhe anashkalimi i këtij hapi do të ishte një gabim.

“Kur anashkalon hapa, në fakt nuk të bën më të shpejtë,” tha Bezos.

“Është një lloj dhurate. Është kaq afër Tokës”, shtoi ai.

Materialet e ngritura nga sipërfaqja hënore kërkojnë 28 herë më pak energji për kilogram sesa ato të lëshuara nga Toka, vuri në dukje ai. Kjo shifër e bën hënën jo vetëm një destinacion, por edhe një furnizues potencial për misione më të thella hapësinore.

Marsi dhe destinacione të tjera do të pasonin, por vetëm pasi të vendoset themeli hënor.

“Ne do të ndërtojmë koloni në Mars e kështu me radhë”, deklaroi Bezos ndër tjera.

Europa po shqyrton ndalimin ose kufizimin e rrjeteve sociale për adoleshentët, ndërsa të dhënat tregojnë se vajzat preken më shumë nga përdorimi problematik i tyre.

Sipas një studimi të mbështetur nga OBSH (HBSC), përdorimi problematik i rrjeteve sociale tek adoleshentët në Evropë është rritur nga 7% në vitin 2018 në 11% në 2022. Ky lloj përdorimi përfshin sjellje si pamundësia për t’u shkëputur nga rrjetet sociale, neglizhimi i aktiviteteve të tjera dhe pasoja negative në jetën e përditshme.

Në disa vende si Rumania, Irlanda dhe Malta janë regjistruar nivelet më të larta të përdorimit problematik te 15-vjeçarët, ndërsa Holanda, Danimarka dhe Estonia kanë nivelet më të ulëta.

Debati po rritet në vende si Britania e Madhe, Franca, Spanja, Austria, Greqia dhe Danimarka, ku qeveritë po shqyrtojnë masa për të kufizuar aksesin e fëmijëve në rrjetet sociale, për shkak të shqetësimeve për bullizmin online, varësinë dhe rastet e vetëdëmtimit.

Studimi thekson gjithashtu se vajzat janë më të prekura se djemtë nga përdorimi problematik i rrjeteve sociale në të gjithë Evropën, duke e bërë këtë çështje edhe më të ndjeshme në diskutimet për rregullimin e platformave digjitale, shkruan Euronews.

Apple pritet të rrisë çmimet e produkteve të saj për shkak të rritjes së ndjeshme të kostos së çipave të memories, ka deklaruar shefi i kompanisë, Tim Cook.

Sipas BBC, Cook tha për Wall Street Journal se rritjet e çmimeve janë “të pashmangshme” dhe situata me çipat e memories është bërë “e paqëndrueshme”.

Ai nuk tregoi kur do të rriten çmimet dhe cilat produkte do të preken, por nuk përjashtohet as iPhone 18, që pritet të lançohet në shtator.

Rritja e kërkesës për pajisje të inteligjencës artificiale ka shkaktuar mungesë dhe shtrenjtim të çipave të memories, të cilët janë komponentë kyç në telefonat dhe pajisjet elektronike. Çmimi i RAM-it është më shumë se dyfishuar që nga tetori 2025.

Cook tha se Apple po përpiqet të mbrojë konsumatorët nga rritjet, por presioni i tregut është bërë i madh: kërkesa është rritur ndërsa furnizimi ka rënë.

Sipas tij, çmimet dhe furnizimi duhet të kthehen në nivele normale për produktet e konsumit.

Analistët parashikojnë se çmimi mesatar i smartfonëve globalisht mund të rritet rreth 20% në vitin 2026, ndërsa telefonat e rinj të Apple mund të kushtojnë deri në 150 dollarë më shumë.

Rritje çmimesh po raportojnë edhe kompani të tjera si Samsung, Sony dhe Nintendo, si dhe prodhuesit e çipave si TSMC.

Pavarësisht rritjeve, shitjet e Apple janë rritur ndjeshëm, të nxitura edhe nga kërkesa e fortë në Kinë.

Binance ka rikonfirmuar përkushtimin e saj ndaj përdoruesve evropianë dhe synimin për të vazhduar operimin në përputhje të plotë me rregulloret në fuqi në të gjithë kontinentin, duke theksuar njëkohësisht rëndësinë e një kornize rregullatore të drejtë, të parashikueshme dhe të harmonizuar për industrinë e aseteve digjitale.

Në një deklaratë zyrtare, Drejtori Rajonal për Evropën Qendrore dhe Lindore (CEE), Kyrylo Khomiakov, konfirmoi se kompania ka ndjekur në mënyrë aktive procesin për pajisje me licencën Markets in Crypto-Assets (MiCA) dhe ka bashkëpunuar ngushtë me rregullatorët evropianë gjatë gjithë procesit të licencimit.

“Binance mbetet e përkushtuar ndaj përdoruesve të saj evropianë dhe do të vazhdojë të operojë në përputhje me ligjin në fuqi,” tha Khomiakov.

Sipas tij, gjatë 18 muajve të fundit kompania ka zhvilluar një bashkëpunim konstruktiv me rregullatorët, përfshirë përmes një procesi gjithëpërfshirës aplikimi pranë Komisionit Helenik të Tregut të Kapitalit (HCMC) në Greqi. Binance theksoi se, sipas informacionit që posedon, rregullatori ka përfunduar shqyrtimin e aplikacionit dhe e ka konsideruar atë në përputhje me kërkesat e MiCA-s.

Kompania shtoi se aplikimi është shqyrtuar gjithashtu në nivel të Autoritetit Evropian për Letrat me Vlerë dhe Tregjet (ESMA), ndërsa HCMC ka shprehur qëndrimin se aplikacioni përmbush kriteret e nevojshme dhe synon të vazhdojë procesin e autorizimit në një nga mbledhjet e ardhshme të bordit.

MiCA, e cila ka hyrë në fuqi në të gjithë Bashkimin Evropian, përfaqëson kornizën e parë gjithëpërfshirëse rregullatore për asetet kripto në rajon dhe synon të ofrojë më shumë siguri juridike, mbrojtje për konsumatorët dhe integritet të tregut.

Binance theksoi se qartësia rregullatore është thelbësore jo vetëm për kompanitë që operojnë në këtë sektor, por edhe për përdoruesit dhe konkurrueshmërinë afatgjatë të Evropës në fushën e inovacionit digjital.

“Ne mbetemi të përkushtuar ndaj Evropës dhe jemi të gatshëm të operojmë në kuadër të një sistemi MiCA të drejtë, të parashikueshëm dhe vërtet të harmonizuar. Rregullimi i qartë dhe konsistent është thelbësor për përdoruesit, për industrinë dhe për konkurrueshmërinë e Evropës në fushën e aseteve digjitale,” shtoi Khomiakov.

Si një nga platformat më të mëdha të kriptovalutave në botë, Binance vazhdon të investojë në përputhshmëri ligjore, siguri dhe bashkëpunim me rregullatorët në tregjet kryesore. Kompania ka theksuar vazhdimisht rëndësinë e bashkëpunimit ndërmjet industrisë dhe institucioneve rregullatore për të nxitur inovacionin, duke ruajtur njëkohësisht standarde të larta të mbrojtjes së konsumatorit.

Këto zhvillime vijnë në një kohë kur interesi për teknologjinë blockchain, asetet digjitale dhe inovacionin Web3 vazhdon të rritet në mbarë Evropën, përfshirë edhe tregjet në zhvillim të Ballkanit Perëndimor. Ekspertët e industrisë vlerësojnë se siguria rregullatore që ofron MiCA mund të luajë një rol kyç në tërheqjen e investimeve, nxitjen e inovacionit dhe forcimin e pozicionit të Evropës në ekonominë digjitale globale.

Pavarësisht pasigurive rregullatore që kanë shoqëruar zbatimin e MiCA-s, Binance vazhdon të vendosë standarde të larta globale në fushën e përputhshmërisë ligjore, bashkëpunimit me rregullatorët dhe mbrojtjes së përdoruesve. Ndjekja e licencës MiCA në Evropë është pjesë e këtij angazhimi afatgjatë.

Binance është bërë gjithashtu bursa e parë e kriptovalutave që ka siguruar një paketë të plotë licencash sipas kornizës rregullatore të Abu Dhabi Global Market (ADGM).

Në aspektin e sigurisë dhe përputhshmërisë, kompania ka parandaluar pothuajse 7 miliardë dollarë humbje të mundshme nga mashtrimet, ka ndihmuar në konfiskimin dhe kthimin e më shumë se 131 milionë dollarëve fonde të paligjshme tek autoritetet gjatë vitit 2025, ndërsa investon mbi 200 milionë dollarë në vit në përputhshmëri ligjore dhe siguri.

Sot, më shumë se 1,500 punonjës të Binance janë të angazhuar në role që lidhen me përputhshmërinë ligjore dhe menaxhimin e riskut, duke përfaqësuar rreth një në katër punonjës të kompanisë.

Kërkesa për aftësi të inteligjencës artificiale (IA) është rritur ndjeshëm në Zvicër. Ekziston një kërkesë e veçantë për punonjësit që mund ta aplikojnë IA-në në punën e tyre të përditshme.

Në vitin 2025, numri i vendeve të lira të punës që lidhen me IA-në u rrit me rreth 9,000 në një rekord prej 25,000, sipas Barometrit të Punës së IA-së të publikuar të hënën nga firma konsulente PWC.

Pavarësisht kësaj rritjeje të fortë, rolet e IA-së përbënin vetëm 1.8% të të gjitha vendeve të punës të reklamuara. Punëdhënësit kërkojnë kryesisht staf që mund ta aplikojnë IA-në në punën e tyre të përditshme. Kërkesa për zhvilluesit e IA-së është rritur shumë më pak ndjeshëm, transmeton albinfo.ch.

Rolet e IA-së janë veçanërisht të përhapura në sektorët e teknologjisë, medias dhe telekomunikacionit. Në të njëjtën kohë, përdorimi i teknologjisë po përhapet gjithnjë e më shumë në industri të tjera.

Sipas PWC, punonjësit me aftësi të IA-së përfitojnë nga paga mbi mesataren, veçanërisht në sektorët e kujdesit shëndetësor dhe energjisë. Studimi bazohet në një analizë që shqyrtoi një total prej më shumë se një miliard reklamash pune në 27 vende.