15 vjet, nga tragjedia e maturantëve të Malishevës

Një tragjedi tronditi Kosovën 15 vjet më parë, ku 15 maturantë të shkollës së mesme “Abdyl Frashëri”, tashti gjimnazi “Hamdi Berisha”, nga Malisheva, patën humbur jetën gjatë një ekskursioni që po bënin në Shqipëri.

Ngjarja kishte ndodhur kur autobusi që po barte 49 maturantë, u rrokullis dhe ra në humnerë në Fushë- Arrëz të Pukës, me ç’rast 34 nxënësit e tjerë u lënduan rëndë.

Pas identifikimet të trupave shteti shqiptar i përcolli në mënyrë dinjitoze nga Ushtria Shqiptare deri në kufirin me Kosovën, nga TMK-ja i solli në lokalet e gjimnazit “Abdyl Frashëri” të Malishevës.       

Varrimi i tyre u bë më 16 tetor te “Lëndina e lotëve” të lagjes “Guri”.

Në njëvjetorin e ngjarjes tragjike, Qeveria shqiptare pati ngritur një obelisk përkujtimor te vendi i ngjarjes në Fushë-Arrëz, kurse në përkujtimin e dyvjetorit të kësaj ngjarjeje, filloi ndërtimi i Kompleksit memorial të varrezave të maturantëve edhe nga Qeveria e Kosovës në Malishevë.