Sami Lushtaku shpallet fajtor për kanosjen e Gazmend Halilajt, gjobitet me 2 mijë euro

Ish-kryetari i Komunës së Skenderajt, Sami Lushtaku, është shpallur fajtor për kanosjen e avokatit Gazmend Halilaj.

Për këtë vepër penale, gjyqtarja Alltën Mureli, i ka shqiptuar Lushtakut gjobën prej 2 mijë eurosh, raporton “Betimi për drejtësi”.

Lushtaku gjobëm prej 2 mijë eurosh mund ta paguajë me dy këste mujore në afat kohor prej 2 muajsh.

Ai, nëse nuk e paguan gjobën, ajo do t’i zëvendësohet me dënim me burgim duke iu llogaritur 20 euro për çdo ditë burgu.

Po ashku Lushtaku duhet t’i paguajë 30 euro shpenzime procedurale, ndërsa 50 euro për Fondin për kompensimin të viktimave

I dëmtuari Gazmend Halilaj udhëzohet në kontest civil, ndërsa palët e pakënaqura kanë të drejtë ankese.

Gjatë shpalljes së aktgjykimit, në seancë nuk ishte prezent ish-kryetari i Komunës së Skenderajt, Sami Lushtaku.

Ndëshkimi ndaj Lushtakut vjen pasi që paraprakisht, në shqyrtimin fillestar të mbajtur, më 28 tetor 2020, ai e kishte pranuar fajësinë për veprën penale të kanosjes.

Këtë veprim të tij, Lushtaku e kishte arsyetuar duke thënë se shkrimet e avokatit Gazmend Halilaj ndaj tij kanë qenë tepër të rënda dhe një gjë të tillë, siç kishte thënë, Halilaj e kishte bërë pasi që ka dashur të rregullonte imazhin e vet në rajonin e Drenicës.

Siç kishte deklaruar Lushtaku, pasi që kishte parë shkrimet e Halilajt në rrjete sociale, nuk kishte mundur të përmbahej, ashtu që në një reagim të momentit edhe e kishte thirrur me telefon Halilajn.

Ndryshe, në këtë rast janë të akuzuar edhe Ibrahim Lushtaku dhe Xhelal Zeqiri. Të dy këta po akuzohen për veprën penale të vrasjes së rëndë në tentativë, pasi sipas prokurorisë, kishin tentuar ta vrisnin të dëmtuarin Halilaj. Lushtaku akuzohet edhe për veprën penale të asgjësimit dhe dëmtimit të pasurisë.

Por, për këto vepra, Ibrahim Lushtaku dhe Xhelal Zeqiri janë deklaruar të pafajshëm, ashtu që tashmë procesi gjyqësor ndaj tyre, do të vazhdojë. Lushtaku dhe Zeqiri akuzohen edhe për armëmbajtje pa leje, por për këtë vepër, të dytë janë deklaruar fajtorë në shqyrtim fillestar.

Sipas aktakuzës, Sami Lushtaku, po akuzohet për veprën penale të kanosjes kurse Ibrahim Lushtaku dhe Xhelal Zeqiri po akuzohen për vrasje të rëndë të mbetur në tentativë. Po ashtu, këta të fundit po akuzohen edhe për armëmbajtje pa leje, ndërsa Ibrahim Lushtaku edhe për asgjësim apo dëmtim të pasurisë, raporton “Betimi për srejtësi”.

Sami Lushtaku po akuzohet se pas një shkrimi të të dëmtuarit Gazmend Halilaj, në rrjetin social “Facebook”, të 11 prillit 2020, në të cilin pretendohej se Sami Lushtaku qëndron prapa keqpërdorimit të 1.4 milionë markave gjatë kohës së luftës, ky i fundit e kishte thirrur me telefon Halilajn dhe i kishte kërkuar që t’i heqte ato shkrime duke e sharë fyer dhe me qëllim të frikësimit e kishte kërcënuar me fjalët “ku je se pa ardh me të kall nuk kam me lan”, me ç’rast tek i dëmtuari kishte shkaktuar frikë dhe ankth.

Me këtë, Sami Lushtaku po akuzohet se ka kryer veprën penale: “Kanosje” nga neni 181 par2 të Kodit Penal, raporton “Betimi për drejtësi”.

Për këtë vepër penale, dënimi i paraparë është me gjobë ose me burgim deri në një vit.

Sipas aktakuzës, pasi që avokati Gazmend Halilaj kishte bërë një shkrim në rrjetin social “Facebook”, më 11 prill 2020, kundër Sami Lushtakut, kushëriri i këtij të fundit, Ibrahim Lushtaku, me qëllim të hakmarrjes dhe në bashkëkryerje edhe me të akuzuarin Zeqiri, më 14 prill 2020, ia kishin zënë pritën Halilajt.

Me të parë Halilajn, vazhdon aktakuza, i akuzuari Ibrahim Lushtaku me dashje që ta privojë nga jeta e ka goditur fuqishëm veturën e të dëmtuarit Halilaj, ashtu që në këtë moment, Halilaj kishte dalë nga vetura dhe kishte filluar të ikë. Sipas aktakuzës, edhe të akuzuarit Lushtaku dhe Zeqiri kishin dalë pastaj nga vetura dhe kishin shtënë me armë në drejtim të Halilajt por nuk kishin arritur ta godasin, raporton “Betimi për Drejtësi”.

Me këto veprime, prokuroria i akuzon Ibrahim Lushtakun dhe Xhelal Zeqirin se kanë kryer veprën penale të vrasjes së rëndë të mbetur në tentativë.

Për shkak se i kishte shkaktuar dëme në lartësi prej 2,700 euro veturës së të dëmtuarit Halilaj, Ibrahim Lushtaku akuzohet nga prokuroria edhe për veprën penale të asgjësimit apo dëmtimit të pasurisë.

Po ashtu, Ibrahim Lushtaku dhe Xhelal Zeqiri akuzohen edhe se në kundërshtim me ligjin për armët kanë mbajtur armë pa leje. Lushtaku akuzohet se ka mbajtur pa leje një revole të tipit “Ekol”, kurse Zeqiri një armë të tipit “Cervena Zastava”.

Me këtë, të dy këta akuzohen për veprën penale “Mbajtja në pronësi, kontroll ose posedim të paautorizuar të armëve”.