Administrata Trump planifikon një test më të ashpër për shtetësinë dhe rishikim të vizës H-1B
Administrata Trump po planifikon të shtrëngojë rregullat për imigracionin e ligjshëm, duke përfshirë edhe ashpërsimin e testit të shtetësisë amerikane dhe ndryshimin e sistemit të vizave H-1B për të favorizuar punëdhënësit me paga të larta, sipas drejtorit të Shërbimeve të Shtetësisë dhe Imigracionit të SHBA-së.
“Testi, siç është paraqitur tani, nuk është shumë i vështirë,” tha drejtori i USCIS, Joseph Edlow, në një intervistë me The New York Times.
“Është shumë e lehtë të mësosh përmendësh përgjigjet. Nuk mendoj se po veprojmë vërtet me frymën e ligjit,” transmeton KosovaPress.
Edlow tha se agjencia synon të rifusë një version të provimit të natyralizimit të nisur gjatë mandatit të parë të Donald Trump, i cili përfshinte më shumë pyetje dhe kërkesa më të ashpra.
Ai gjithashtu sugjeroi reforma në programin e vizave H-1B – i cili lëshon 85,000 leje pune çdo vit për profesionistë të huaj në fusha të specializuara – duke përfshirë një ndryshim drejt favorizimit të aplikantëve me pagat më të larta.
“Unë me të vërtetë mendoj se mënyra se si duhet të përdoret H-1B… është të… plotësojë, jo të zëvendësojë, ekonominë amerikane dhe bizneset amerikane dhe punëtorët amerikanë,” tha ai.
Kritikët thonë se ndryshimet mund të zvogëlojnë qasjen për emigrantët e rinj, shumë të kualifikuar.
“Caktimi i vizave H-1B vetëm për ofertat më të larta të pagave do të favorizonte punëtorët më të vjetër që mund të dalin në pension ose të largohen nga vendi,” tha David Bier, drejtor i studimeve të imigracionit në Institutin Cato, në komentet për Newsweek.
“Është e çuditshme të thuash se testi është i lehtë kur është një test që shumica e amerikanëve do ta dështonin,” shtoi ai.
Departamenti i Sigurisë Kombëtare po shqyrton gjithashtu zëvendësimin e procesit aktual të përzgjedhjes H-1B të bazuar në lotari me një sistem të ponderuar bazuar në nivelet e pagave – një propozim i mbështetur nga grupe si Instituti për Progres, i cili tha se ndryshimi mund të rrisë ndikimin ekonomik të programit deri në 88%.
Ndërsa disa zëra të lidhur me republikanët mbeten kritikë ndaj imigracionit, Edlow theksoi mbështetjen për migrimin e ligjshëm që përputhet me interesat e SHBA-së.
“Mendoj se absolutisht duhet të jetë një pozitiv neto,” tha ai. “Nëse po shohim njerëzit… që vijnë për të çuar përpara agjenda të caktuara ekonomike… kjo është absolutisht ajo për të cilën duhet të kujdesemi.”
Reformat e mëdha të imigracionit – duke përfshirë ndryshimet në sistemin e vizave ose provimin e shtetësisë – ka të ngjarë të kenë nevojë për miratim nga agjenci të tjera federale ose Kongresi, ku përpjekjet dypartiake mbeten nën debat.
