ARKEP: S’kemi informacione zyrtare, nëse “Telekom Serbia”, ka shprehur interes ta blejë IPKO-n
Bordi i Autoritetit Rregullator të Komunikimeve Elektronike dhe Postare(ARKEP) ende nuk e dinë zyrtarisht nëse “Telekom Serbia” ka shprehur interes ta blejë IPKO-n në Kosovë.
Anëtari i bordit të ARKEP-it, Shqipërim Pula, ka thënë se pas një takimi me përfaqësuesit e Telekomit Slloven si përfaqësues të shitjes së operatorit mobil IPKO, është thënë se ka disa blerës të mundshëm në proces dhe është numër dyshifrorë, asgjë më shumë.
“Emrat potencialë të blerësve nuk na i kanë treguar. Ne si autoritet, ua e kemi bërë të qartë se në përfundim të fazës së dytë janë të obliguar të tregojnë emrat e kompanive potenciale dhe pas kësaj ne do të njoftojmë institucionet përkatëse. Sepse, kemi të bëjmë me sigurinë kombëtare. Pra, përfaqësuesit e Telekomi të Sllovenisë janë pajtuar që do të tregojnë emrat për t’u hetuar nga AKI=ja dhe Agjencia për Intelegjencë Financiare se a është i pranueshëm për shtetin tonë”, tha Pula.
Këto komente Pula i ka bërë gjatë raportimit në Komisionin parlamentar për ekonomi.
Pula nuk ka përjashtuar mundësinë që deri në nëntor ose dhjetor mund të përfundojë procesi i tretë dhe përfundimtar i privatizimit.
Anëtarja e komisionit, deputetja Minoza Kusari-Lila ka thënë se ARKEP-i aktualisht është jo legjitim pasi nuk ka kuorum të bordi i saj(vetëm katër anëtarë) dhe në këtë mënyrë nuk ka të drejtë ta udhëheqë këtë proces.
“Çfarë autoriteti ka sot ARKEP-i të bisedojë me një përfaqësues të shitjes? Duhet të plotësohet ky bord për të qenë funksional pasi Shqipërim Pula flet në emër të ARKEP-it pa pasur legjitimitet”, tha ajo.
I shqetësuar me këtë proces është edhe deputeti Pal Lekaj, i cili ka kërkuar garanci nga ARKEP-i se asetet e IPKO-s nuk shkojnë aty ku nuk duhet, në këtë rast te “Telekom Serbia”, pasi siç tha ai rrezikohet siguria kombëtare.
Ndërsa, anëtari tjetër i komisionit Hekuran Murati ka kërkuar qëndrim nga drejtues të ARKEP-it se në rast se do të jetë blerës i IPKO-s “Telekom Serbia”, a do të pantoheshin me këtë blerës?
Për këtë, Pula pati një përgjigje
“Për aq kohë sa jam unë në ARKEP, në asnjë variant Telekomi i Serbisë nuk do të jetë blerës i IPKO-s. Nuk e themi këtë për patriotizëm”, tha Pula.
Ndërsa, Ferat Shala anëtar i komisionit, ka pyetur se çfarë ndodh në rast se mbetet ARKEP-i pa bord deri në dhjetor dhe shitja e IPKO-s bëhet në këtë muaj.
Megjithatë, edhe pse bordet pa mandat nuk mund të marrin vendime, Pula i është përgjigjur se do të mbesin anëtarë në detyrë.
Bordi i ARKEP-it do të mbetet pa mandat nga 15 dhjetori.
