SHBA konfirmon sulmin vdekjeprurës në Karaibe
Komanda Jugore e SHBA-së publikoi imazhe të një sulmi kinetik vdekjeprurës ndaj një anijeje në ujërat ndërkombëtare në Karaibe të hënën më 10 nëntor.
Katër anëtarët e ekuipazhit në bord u “vranë”, konfirmoi administrata amerikane, duke e çuar totalin në gati 80 të vdekur në më shumë se 20 sulme që nga fillimi i operacionit në gusht pranë brigjeve të Venezuelës, raporton KosovaPress.
Sekretari i Luftës i SHBA-së Pete Hegseth e quajti zyrtarisht misionin ‘Shtiza Jugore’, duke e justifikuar atë si një veprim për të luftuar trafikimin e drogës nga Amerika Latine.
Vendosja përfshin afërsisht 10,000 trupa dhe aeroplanmbajtësen USS Gerald R. Ford, anija kryesore më e madhe e Pentagonit, e pozicionuar pranë ujërave të Venezuelës.
Sipas Washington Post, Trump u takua të premten në Zyrën Ovale me zyrtarë të Pentagonit për të diskutuar “një sërë opsionesh”, duke përfshirë përshkallëzimin e sulmeve. Një zyrtar i cituar nga gazeta tha se forcat amerikane “po përgatiten për urdhra të mundshëm sulmi” dhe po presin udhëzime të reja operacionale.
Kur u pyet nga gazetarët për veprimin e tij të ardhshëm ushtarak ndaj Venezuelës, Trump tha: “Nuk mund t’ju them se cili do të jetë, por në një farë mënyre e kam vendosur.” Ai shtoi se ata “kanë bërë shumë përparim me Venezuelën në drejtim të ndalimit të fluksit masiv të drogës”, megjithëse nuk dha detaje mbi planet e tij.
Zyrtarët amerikanë të cituar nga Washington Post thanë se Trump është “shumë i mirë në ruajtjen e paqartësisë strategjike” dhe se presidenti venezuelas Nicolás Maduro “është shumë i frikësuar dhe duhet të jetë i frikësuar”, duke pasur parasysh gamën e opsioneve “të dëmshme” në tryezë. Në tetor, Trump kishte deklaruar tashmë se nuk përjashtonte sulme të mundshme ndaj objektivave tokësore si në Venezuelë ashtu edhe në Kolumbi.
Qeveria e Venezuelës dënoi ‘Operacionin Shtiza Jugore’ dhe e quajti atë një “pretekst për ndërhyrje”. Nga ana e tij, Maduro i ka bërë thirrje popullsisë të përgatitet për një “luftë të armatosur” eventuale dhe njoftoi vendosjen e 200,000 personelit ushtarak në vend.
Tensioni në rajon vazhdon të rritet ndërsa Uashingtoni nuk përjashton operacione të reja ushtarake dhe bashkësia ndërkombëtare vëzhgon me shqetësim përshkallëzimin e luftës në Karaibe.
