1 mijë e 586 raste të reja me kancerin u evidentuan më 2019, në Klinikën e Onkologjisë

Dita Botërore e Luftës Kundër Kancerit është një mundësi për të rritur ndërgjegjësimin e luftës kundër kancerit, si edhe për të treguar se zgjidhjet nuk janë të pamundura.

Kështu u tha në një konferencë, organizuar nga Klinika e Onkologjisë dhe Shoqata e Onkologëve të Kosovës, me rastin e shënimit të Ditës Botërore të Kancerit, ku u bë e ditur se 1 mijë e 586 raste të reja me kancerin janë evidentuar gjatë vitit 2019 në Klinikën e Onkologjisë.

Drejtori i Onkologjisë, Ilir Kurtishi, bëri të ditur se edhe këtë vit janë përballur me sfida të shumta me pacientët e prekur me sëmundjen e kancerit, por që sipas tij, pavarësisht sfidave, ata janë munduar t’u ofronin shërbime të gjithëve.

Kurtishi tha se 217,143 shërbime janë dhënë në kimioterapi gjatë vitit 2019.

Ai bëri të ditur se në Kosovë numri i rasteve me kancerin është më i vogël në krahasim me vendet e tjera. Ndërsa, kryetari i Shoqatës së Onkologëve, Arben Bislimi tha se kanceri është sëmundja e dytë më vdekjeprurëse, andaj duhet ta luftojmë.

Ndryshe, qëllimi i Ditës Botërore të Luftës Kundër Kancerit është vetëdijesimi dhe informimi i qytetarëve rreth kësaj sëmundjeje.