12 nxënës e 13 mësimdhënës -të prekur me Covid, në Gjilan

Pas rikthimit të infeksionit në Komunën e  Gjilanit, kryetari i kësaj komune, Lutfi Haziri, ka ftuar qytetarët që t’i mbajnë maskat në rrugë, lokale e në punë, në mënyrë që t’i evitojnë gjobat dhe t’i kthehen solidaritetit e lojalitetit.

Këto komente, kreu i Gjilanit i ka bërë në një konferencë shtypi, pas takimit të Komitetit për parandalimin e përhapjes së COVIDIT-19.

“Gjilani ka realizuar 4200 teste në këtë fazë pandemie dhe deri sot fatkeqësisht janë 48 vdekje nga COVIDI-19, 165 raste janë aktive dhe nën mbikëqyrje nga institucionet tona,, 1229 janë të infektuar në total, 1015 të shëruar, 12 raste janë të shtruar në spital dhe 178 mostra janë në pritje për rezultate”, ka thënë Haziri, teksa ka njoftuar se pas disa rasteve pozitive në shkolla, nuk ka vend për shqetësim.

Ai tha se po punojnë bashkërisht me të gjitha institucionet relevante, që ta ulin infeksionin në pikën zero.

Ndërkaq, drejtori i Arsimit i Gjilanit, Nazim Gagica, ka njoftuar se për momentin janë të infektuar 12 nxënës, 13 mësimdhënës dhe 3 punëtorë teknikë, në shkollat publike.

“Rastet janë në monitorim të vazhdueshëm nga Task-forca e DKA-së. Tashmë të gjitha shkollat e kanë urdhëresën për respektim të masave nga shkollat. Lajm i mirë është që në 75 për qind të shkollave nuk ka infeksion me COVID-19”, ka thënë Gagica.

Mesazhe për respektimin e masave antiCOVID-19 kanë dhënë edhe drejtori klinik i Spitalit të Përgjithshëm, dr. Ukshin Ismaili, drejtoresha e Qendrës Rajonale të Shëndetit Publik, dr. Ajhane Sefiu dhe drejtoresha e QKMF së Gjilan, dr. Arbenita Hajdari.