18-vjetori i pavarësisë, Rubio: SHBA-ja e palëkundur në mbështetje të sovranitetit të Kosovës

Sekretari amerikan i Shtetit, Marco Rubio, ka uruar Kosovën në 18-vjetorin e pavarësisë.

Rubio në urimin e tij ka thënë se Shtetet e Bashkuara të Amerikës mbeten të palëkundura në mbështetjen e tyre për sovranitetin dhe integritetin territorial të Kosovës. Në deklaratë është përmendur edhe pjesëmarrja e Kosovës në Bordin e Paqes të presidentit Trump.

“Në emër të Shteteve të Bashkuara të Amerikës, i shpreh urimet e mia popullit të Republikës së Kosovës ndërsa shënoni Ditën e Pavarësisë.

Shtetet e Bashkuara mbeten të palëkundura në mbështetjen e tyre për sovranitetin dhe integritetin territorial të Kosovës dhe mezi presim të zgjerojmë lidhjet ekonomike që do të rrisin prosperitetin e të dy kombeve tona. Ne e vlerësojmë mbështetjen e Kosovës për përpjekjet e SHBA-së për t’u përballur me sfidat globale dhe mirëpresim udhëheqjen e saj si Anëtare Themeluese e Bordit të Paqes.

Ndërsa Kosova shënon këtë përvjetor të rëndësishëm, mezi presim një bashkëpunim edhe më të fortë në vitet në vijim. Shtetet e Bashkuara qëndrojnë me Kosovën ndërsa ajo vazhdon të ndërtojë një të ardhme të sigurt dhe të begatë”, thuhet në urimin e publikuar nga Departamenti Amerikan i Shtetit.