Akuzat për korrupsion, a do të japë dorëheqjen sot kryeministri spanjoll?

Kryeministri socialist i Spanjës Pedro Sanchez pritet sot të tregojë nëse do të japë dorëheqjen apo jo, pas akuzave për korrupsion me të cilat përballet bashkëshortja e tij Begonia Gomet.

Sanchez, 52 vjeç, papritur njoftoi të mërkurën e kaluar se po mendonte të largohej dhe tha se do të njoftonte vendimin e tij të hënën.

Kryeministri i Spanjës, në pushtet që nga viti 2018 , tha në një letër të hapur drejtuar qytetarëve, të publikuar përmes X, se do të shqyrtonte nëse ia vlente të vazhdonte mandatin e tij duke pasur parasysh “akuzat e pabaza kundër gruas së tij”.

Ai duhej të vendoste “nëse do të vazhdonte si kreu i qeverisë apo do të jepte dorëheqjen”, për të hequr dorë nga ky nder i madh, siç shpjegoi ai.

Akuzat për korrupsion

Akuzat ndaj B. Gometh u nisën nga organizata Manos Limpias (“Duart e Pastra”), e cila është e lidhur me të djathtën ekstreme, duke e akuzuar atë për ushtrim të ndikimit të padrejtë në detyë dhe korrupsion.

Organizata më vonë pranoi se akuzat bazoheshin në raportet e shtypit që mund të jenë të pavërteta.

Prokuroria e Madridit rekomandoi javën e kaluar që hetimi paraprak kundër Gometit të pushohej.

Sipas Kushtetutës, nëse Sanchez largohet, Mbreti Felipe VI do të duhet të konsultohet me krerët e partive politike dhe më pas të propozojë pasardhësin e tij në Parlamentin spanjoll.

Skenarët e mundshëm për Spanjën

Ajo që do të bëjë Sanchez është një mister edhe për rrethin e tij të ngushtë. El Pais të hënën përmend “pasiguri absolute dhe heshtje të kryeministrit”. Ai mund të vendosë të qëndrojë në pushtet, të kërkojë votëbesim nga delegacioni kombëtar spanjoll ose të mbajë zgjedhje të parakohshme.

Data më e shkurtër e mundshme për mbajtjen e tyre në rastin e fundit do të ishte 21 korriku. Vihet re se Sanchez u rizgjodh në detyrën e kryeministrit pas zgjedhjeve të vitit të kaluar, si kreu i një qeverie të pakicës.

Ndërkohë, megjithëse kreu i Partisë Popullore Alberto Núñez Feijo po përpiqej të merrte postin e kryeministrit, nuk është e sigurt se ai do të siguronte mbështetjen e nevojshme parlamentare për të formuar një qeveri.

Nëse askush nuk arrin të sigurojë mbështetjen e shumicës së 350 deputetëve të Parlamentit brenda dy muajve, Dhoma do të shpërndahet dhe do të mbahen zgjedhje të reja.

Më shumë se 10,000 njerëz demonstruan në Madrid të shtunën dhe 5,000 të tjerë të dielën për t’i bërë thirrje Sanchez të qëndrojë në detyrë.

Ndikimi në BE

Përveç trazirave që do të shkaktonte brenda vendit mundësia e dorëheqjes së tij, largimi i mundshëm i Sanchez do të ndikonte edhe në mbledhjet vendimtare të Këshillit Europian për përzgjedhjen e drejtuesve të rinj të institucioneve të BE-së.

Socialistët duan dëshpërimish që një nga anëtarët e tyre të pasojë Charles Michel si President i Këshillit Europian.