IKD-ja gjen se kuvendi zhvilloi punime në tre raste pa e miratuar rendin e ditës

Naim Jakaj, hulumtuesi i lartë nga Instituti i Kosovës për Drejtësi (IKD), të premten gjatë prezantimit të raportit me titull: “Kuvendi i dështimeve” ka thënë Kuvendi i Kosovës zhvilloi punime në tre raste pa e miratuar rendin e ditës.

“Sa i përket respektimit të procedurave në pajtim me rregulloren e kuvendit, IKD- gjen se në tre raste Kuvendi i Kosovës zhvilloi punime pa miratuar rendin e ditës në seancë plenare, për arsye se ky rend i ditës nuk u votua në Kryesinë e kuvendit në mungesës të kuorumit”, tha Jakaj.

Në një rast, Jakaj tha se IKD-ja ka gjetur se kryetari i kuvendit interpretoi gabimisht Rregulloren e kuvendit për mosfillimin dhe mbajtjen e një seance të jashtëzakonshme për arsye se në sallë nuk ishin të pranishëm 61 deputetë, raporton “Betimi për Drejtësi”.

Sipas tij, IKD-ja vlerëson se kuorumi në seancë plenare është i domosdoshëm dhe i patejkalueshëm për votimin e projektligjeve dhe akteve të tjera të Kuvendit, por kuorumi nuk duhet të jetë pengesë për zhvillimin e debatit parlamentar, veçanërisht kur ajo është e thirrur nga 1/3 e deputetëve të Kuvendit të Kosovës, bashkësi deputetësh që me Kushtetutë kanë të drejtën e propozimit edhe të amendamenteve kushtetuese.

Instituti i Kosovës për Drejtësi (IKD), me përkrahje të Rockefeller Brothers Fund (RBF), të premten, në konferencën e organizuar për media ka publikuar raportin “Kuvendi i dështimeve”- Raport i monitorimit të punës së Kuvendit të Kosovës për vitin 2023. Ky raport përfshin gjetjet, vlerësimet dhe rekomandimet si rezultat i monitorimit sistematik të bërë në Kuvendin e Kosovës.