20 vjet nga pafajësia: Limaj thotë se është trishtuese që edhe sot lufta çlirimtare vazhdon të testohet e sfidohet po në Hagë

Fatmir Limaj kujtoi aktgjykimin e 30 nëntorit 2005, duke e cilësuar atë si një dëshmi se lufta e Ushtrisë Çlirimtare të Kosovës ishte e drejtë dhe në mbrojtje të popullit që kërkonte lirinë.

Ai rikujtoi sfidat e gjykimit të tij dhe të dy bashkëluftëtarëve, Isak Musliu dhe Haradin Balaj, në një kohë kur Kosova ende nuk kishte mbështetje institucionale. Limaj tha se e vërteta e UÇK-së dhe përballja e tyre në Hagë u mbështetën vetëm te populli dhe drejtësia.

Duke e quajtur të trishtuese faktin që edhe sot proceset ndaj pjesëtarëve të UÇK-së vazhdojnë në Hagë, ai shprehu bindjen se bashkëluftëtarët e tij do të lirohen.

Limaj kritikoi gjithashtu institucionet e Kosovës për, siç tha, mungesë të angazhimit në mbrojtje të historisë dhe së vërtetës së luftës çlirimtare.

Në fund, ai theksoi se mbetet “përjetësisht krenar” për luftën e UÇK-së, duke e cilësuar atë “të pastër si loti”.