31 të vdekur në burgun e Ekuadorit pas përleshjeve mes bandave rivale

Të paktën 31 të dënuar janë gjetur të vdekur në një burg në jug të Ekuadorit, 27 prej tyre të varur në litar. Viktimat janë rezultat i një përplasjeje të dhunshme mes bandave rivale në burgun “El Oro”, në qytetin Maçala, që shpërtheu të dielën.

Sipas autoriteteve, 30 persona të tjerë kanë mbetur të plagosur si pasojë e akteve të dhunës. Oficerët e sigurisë, që hynë në burg disa orë më vonë, gjetën fillimisht katër trupa të pajetë dhe më pas të tjerët, të varur në katin e tretë të godinës.

Burgjet e tejmbushura të Ekuadorit janë prej kohësh skena të përleshjeve të dhunshme midis bandave, të cilat kanë shkaktuar qindra viktima gjatë viteve të fundit.

Shërbimi i burgjeve të vendit njoftoi se përplasjet e fundit u shkaktuan nga planet e autoriteteve për të zhvendosur disa të dënuar në një burg të ri. Më herët këtë vit, qeveria e presidentit Daniel Noboa kishte njoftuar ndërtimin e një burgu të ri të sigurisë së lartë në provincën Santa Elena.

Struktura e re, e quajtur “El Encuentro”, pritet të hapet në fund të muajit dhe do të pajiset me teknologjinë më të avancuar të sigurisë.

Bandat e burgjeve kanë luajtur për vite me radhë një rol kyç në rritjen e kriminalitetit të dhunshëm në Ekuador. Dy prej tyre, “Los Lobos” dhe “Los Choneros”, u shpallën organizata terroriste nga Departamenti Amerikan i Shtetit në shtator.