35-vjeçari u gjet i copëtuar me sëpatë, mamaja e tij pranon gjithçka: E bëra unë
Një ngjarje tronditëse ka tronditur komunitetin e vogël të Gemona del Friuli, në veri të Italisë, ku trupi i Alessandro Venier, 35 vjeç, u gjet i copëtuar me sëpatë në një kazan të vjetër në bodrumin e shtëpisë së tij.
Pas disa ditësh hetimesh intensive, mamaja e tij, Lorena Venier, ka rrëfyer para hetuesve se ajo vetë ka kryer krimin.
“Isha unë dhe e di se ajo që kam bërë është monstruoze”, është shprehur ajo.
Trupi i pajetë u gjet mëngjesin e së shtunës, i fshehur në një kazan dhe i mbuluar me gëlqere, në përpjekje për të penguar përhapjen e erës. Viktima jetonte në shtëpinë familjare së bashku me nënën, partneren 31-vjeçare me origjinë kolumbiane dhe vajzën e tyre të vogël, të lindur para disa muajsh.
Dyshohet se vrasja ka ndodhur të premten, ditën e fundit kur Venier është parë i gjallë. Njoftimi për vendndodhjen e trupit u dha nga vetë partnerja e tij dhe nëna, të cilat thirrën urgjencën.
Avokati i Lorena Venier ka konfirmuar për mediat italiane se ajo ka pranuar autorësinë e aktit. Megjithatë, partnerja kolumbiane mbetet gjithashtu nën hetim, pasi dyshohet se mund të ketë qenë e përfshirë në një formë apo tjetër.
Një nga pistat kryesore hetimore është ajo e një zënke të papritur, që dyshohet të ketë nisur për një arsye banale – refuzimi i të riut për të shtuar tryezën. Hetuesit nuk përjashtojnë mundësinë që kjo të ketë qenë shkëndija e fundit në një raport të tendosur prej kohësh mes të riut dhe dy grave në shtëpi.
Lorena Venier, e njohur në zonë si një infirmiere e sjellshme dhe pa precedentë, kishte rritur djalin e saj vetëm, pas një lidhjeje me një shtetas egjiptian që nuk e kishte pranuar fëmijën. Prej vitesh jetonte në Gemona, ku konsiderohej si një grua e qetë.
Fqinjët shprehen të tronditur dhe e përshkruajnë familjen si të rregullt, pa konflikte të dukshme. Megjithatë, disa prej tyre kanë konfirmuar se karabinierët kishin ndërhyrë herë pas here në shtëpi, për shkak të problemeve të mëparshme të Alessandro-s, i cili kishte varësi nga droga dhe alkooli, si dhe disa precedentë penalë.
Ai nuk kishte një punë të qëndrueshme, por ishte i apasionuar pas fitnesit dhe ecjeve në natyrë. Sipas informacioneve të para, planifikonte të udhëtonte sërish drejt Kolumbisë, ku dyshohet se ishte njohur me partneren e tij.
