36 vatra zjarri të raportuara sot në gjithë vendin, 4 ende aktive

Agjencia e Menaxhimit Emergjent njofton se, sipas të dhënave të pranuara nga Qendrat Operative 112, gjatë ditës së sotme në nivel vendi janë regjistruar gjithsej 36 vatra zjarri.

Nga këto raste, 32 vatra janë lokalizuar falë reagimit të shpejtë dhe profesional të Njësive të Zjarrfikjes dhe Shpëtimit, ndërsa 4 vatra vazhdojnë të jenë aktive, me përpjekjet për shuarjen e tyre që po vazhdojnë në koordinim të plotë me autoritetet lokale dhe ekipet në terren.

Agjencia e Menaxhimit Emergjent u bën thirrje qytetarëve që të shmangin çdo veprim që mund të shkaktojë zjarr, përfshirë ndezjen e zjarreve në hapësira të hapura, hedhjen e mbeturinave të ndezura apo aktivitete të tjera të pakontrolluara që mund të shkaktojnë zjarrvënie.

Gjithashtu, Agjencia inkurajon qytetarët që të denoncojnë pranë organeve kompetente çdo rast të zjarrvënies së qëllimshme dhe të raportojnë rastet emergjente përmes numrave zyrtarë të thirrjeve emergjente: 112, 193 dhe 192.

Agjencia e Menaxhimit Emergjent shpreh falënderim të veçantë për të gjithë Zjarrfikësit dhe Qendrat Operative 112 për angazhimin dhe profesionalizmin e treguar në menaxhimin dhe lokalizimin e zjarreve në të gjithë territorin e vendit.