80 zv/ministra për 1 vit kishin në dispozicion mbushje telefoni në vlerë prej 144,000 euro

Edison Jakurtin, zëvendësministër në detyrë i Ministrisë së Ekonomisë, Punësimit, Tregtisë, Industrisë, Ndërmarrësisë dhe Investimeve Strategjike, përmes një postimi të bërë në Facebook, ka pasqyruar shpenzimet e zëvëndësministrave të qeverisë Haradinaj, për mbushjet e telefonave.

Jakurti ka thënë se 80 Zv. Ministra për 1 vit kishin në dispozicion mbushje telefoni në vlerë prej 144,000 euro. Ndërsa, për një të varur nga ndihma sociale kishin ndarë mesatarisht 23.7 euro në muaj.

Ky ëshytë postimi i plotë i tij:

Sot bëhet 1 muaj prej që jam emëruar. Dhe, është mëse e qartë se e vjetra nuk ka vdekur ende. Dje pata një prej ngjarjeve më shokuese në këtë kohë.

Mbase kisha dëgjuar por kështu nuk i kisha parë. Mbase kjo ishte arsyeja që më goditi.

Këto që shihni në foto nuk janë veç 30 kartela me mbushje telefoni prej 5 euro. Ky në fakt është privilegji i Zv. Ministrave të PAN-it. Pra, 150 euro në muaj për telefon.

I bie që 80 Zv. Ministra për 1 vit kishin në dispozicion mbushje telefoni në vlerë prej 144,000 euro. Ndërsa, për një të varur nga ndihma sociale kishin ndarë mesatarisht 23.7 euro në muaj.

Vetëm kur mungon ndjeshmëria minimale ndaj rrethit, në vendin e tretë më të varfër në Evropë, i lejon vetes privilegje të tilla krejtësisht absurde.

Nga 1 maji ka hyrë në fuqi vendimi i kryeministrit Kurti që e lejon deri në 1/3 e kësaj shume. Mbase duhet ulur edhe më shumë.

P.S. Natyrisht, 100% e këtyre në foto do të shkojnë donacion.