800 mijë euro për projektin “Ibrahim Rugova”

Kryetari i Prishtinës, Përparim Rama ka bërë lëvizjet e para për ndërtimin e parkut përkujtimor “Ibrahim Rugova” dhe “Biblioteka Presidenciale”.

Për këtë projekt komuna i ka paraparë buxhet 800 mijë euro, shkruan Indeksonline.

Në dosje të tenderit thuhet se ky projekt do të realizohet në përputhje me vizionin e kryetarit aktual të Prishtinës Përmparim Rama.

“Dr. Ibrahim Rugova ishte një figurë kryesore në luftën e Kosovës për pavarësi, i njohur për rezistencën e tij paqësore dhe përkushtimin e palëkundur ndaj popullit të tij. I gjithë kontributi i tij politik dhe institucional e bënë atë ideator dhe themelues të Republikës së Kosovës.  “Parku Përkujtimor Dr.Ibrahim Rugova dhe Biblioteka Presidenciale” synojnë jo vetëm të përkujtojnë trashëgiminë e tij, por edhe të shërbejnë si katalizator për transformimin pozitiv të Prishtinës.

Përafrimi me vizionin e kryetarit Përparim Rama: Ky projekt përputhet me vizionin e kryetarit Rama për një Prishtinë moderne, gjithëpërfshirëse dhe një fener të trashëgimisë kulturore. Parku dhe biblioteka përkujtimore do të kontribuojnë në këtë vizion duke krijuar një hapësirë publike tërheqëse dhe të aksesueshme.”, thuhet në dosje të tenderit të publikuar në platformën online E-prokurimi.

Po ashtu në këtë dosje janë listuar edhe objektivat e projektit si më poshtë:

Përkujtim: Krijo një nderim të përshtatshëm për jetën dhe kontributet e Dr. Ibrahim Rugovës, së bashku me heronjtë e tjerë kombëtarë, sakrificat e të cilëve formësuan lirinë e Kosovës.

Arsimi: Nxitja e një kuptimi më të thellë të historisë së Kosovës dhe rolit të kryetarit historik Dr. Ibrahim Rugova në formësimin e kombit përmes një Biblioteke Presidenciale që shërben si burim për kërkime dhe mësim publik.

Hulumtimi: Mbështetja e punës kërkimore dhe shkencore në lidhje me historinë politike të Kosovës dhe trashëgiminë e Dr. Ibrahim Rugovës, duke ofruar hapësira për arkiva, ekspozita dhe angazhim akademik.

Angazhimi i komunitetit: Promovoni angazhimin qytetar dhe nxitni ndjenjën e përkatësisë midis komunitetit lokal përmes ekspozitave interaktive, programeve edukative dhe ngjarjeve kulturore.

Zhvillimi Urban: Përmirësoni peizazhin urban të Prishtinës duke krijuar një hapësirë publike tërheqëse vizualisht dhe të aksesueshme që integrohet pa probleme me identitetin modern dhe krijues të qytetit.

Lokacioni përfshihet me Planin Rregullues “Muhaxhirët” në Prishtinë.

“Në lokacion gjindet memoriali kushtuar të rënëve të Luftës së Dytë Botërore, varri i kryetarit historik Dr. Ibrahim Rugova si dhe varrezat e dëshmorëve të UÇK-së, të cilat duhet të integrohen në zgjidhjen e propozuar me këtë konkurs”, thuhet në dosje të tenderit. Afati për dorëzimin e ofertave është deri më 22 mars të këtij viti. /Indeksonline/