Trump: Policia nuk duhet të përdorë metodën e shtrëngimit në qafë për të ndaluarit

Policia nuk  duhet të përdorë “metodën e ngufatjes” me anë të së cilës ndalon një person duke e shtrënguar në qafë në mënyrë që ai apo ajo të dorëzohet, tha Presidenti i Shteteve të Bashkuara të Amerikës, Donald Trump.

Trump në një intervistë për Fox News me 12 qershor, tha se në përgjithësi, kjo metodë e përdorimit të forcës duhet të ndalohet.

“Mua nuk më pëlqen kjo metodë, por.. nganjëherë kur jeni duke e luftuar dikë i vetëm, është vështirë”, tha ai.

Komente të tilla vijnë pasi që presidenti amerikan, ka thënë se përmes  një urdhri ekzekutiv do të mund të inkurajojë departamentet policore që të zbatojnë “standardet aktuale profesionale sa i përket përdorimit të forcës”, në kohën e protestave kombëtare kundër racizimit, që janë nxitur pas vdekjes së afrikano-amerikanit, George Floyd sa ka qenë në mbajtje policore.

Trump, që garon për një tjetër mandat si president i SHBA-së, ka thënë se administrata e tij do të shtyjë përpara, në mënyrë agresive, zhvillimin në komunitetet me minoritete, do të përballet me pabarazitë rreth kujdesit shëndetësor, duke investuar “shuma substanciale” në institucionet mjekësore, si dhe do të përmirësojë mundësitë për shkollim.

Demokratët në Kongresin amerikan po ashtu e kanë kërkuar ndryshimin e legjislacionit, ku përfshihet heqja e metodës së shtrëngimit në qafë dhe kufizimi i mbrojtjes ligjore për policët. Edhe republikanët janë shprehur të hapur për reforma.

Në SHBA, shtetet janë duke rishikuar protokollet për të bërë ndryshime në përdorimin e forcës nga ana e policisë.

Në Mineapolis, në vendin ku George Floyd ndërroi jetë gjatë mbajtjes, liderët votuan njëzëri për reformat që e kthejnë policinë në “polici të komunitetit”.