Kremlini akuzon Navalnyn: Agjent i CIA-s

Rusia ka akuzuar sot Alexei Navalnyn se po bashkëpunon me CIA-n, një ditë pasi kritiku i Kremlinit tha se Vladimir Putini ishte përgjegjësi për helmimin e tij.

Zëdhënësi i Kremlinit, Dmitry Peskov, i hodhi poshtë akuzat e Navalnyt, duke i quajtur “të pabaza dhe të papranueshme”. Ai shtoi se specialistë nga inteligjenca amerikane po punonin me Navalnyn këto ditë dhe i kanë dhënë atij udhëzime.

“Navalny po punon me shërbime sekrete të vendeve perëndimore”, tha Peskovi.

Navalny e drejtoi gishtin nga Putini në një intervistë me revistën gjermane “Der Spiegel”, duke thënë: “Putin është pas këtij krimi dhe nuk kam asnjë version tjetër për atë që ndodhi”.

Ai e përshkroi kështu momentin kur helmi “Novichok” nisi të bënte efekt: “Nuk ndjen fare dhembje, por e kupton që po vdes”.

Navalny doli nga spitali gjerman javën e kaluar, pas 32 ditësh trajtim. Mjekët thonë se është shumë herët për të thënë nëse ai do të ketë pasoja afatgjatë apo jo nga helmimi.