Conte: I bëmë Realit dy dhurata, ky është Interi im

Trajneri i Inter-it, Antonio Conte, ka folur pas humbjes 3-2 të pësuar në Champions League kundër Real Madrid.

“Ky është Inter-i im, në të mirë dhe në të keq. Mendoj se jemi në rritje dhe unë nuk njoh shumë skuadra që të vijnë në Madrid dhe të luajnë një futboll të tillë. Ne rikuperuam një disavantazh 2-0 pas dy dhuratave tona dhe kemi patur rastet për të fituar 3-2”, ka thënë Conte për Sky Sport.

“Ne pësuam golin e tretë dhe rezultatet që kemi marrë në ndeshjet e fundit nuk kanë qenë shpërblimi që meritonin lojtarët për punën e tyre, por kjo tregon se detajet vendosin ndeshjet”.

“Real Madrid ka folur për një finale, kështu që ka dhënë maksimumin, ne ishim të përqendruar, të vendosur dhe e dinim rëndësinë e rezultatit. Jam i kënaqur me paraqitjen në përgjithësi, por detajet bëjnë diferencën në këto nivele”.