Zemaj në Austri, takon miq të Kosovës
Ministri i Shëndetësisë, Armend Zemaj, vazhdon vizitën zyrtare në Austri. Zemaj ka takuar sot takime të ndara me disa miq të Kosovës.
Ai ka thënë se Austria ka qenë ndër shtetet që ka ndihmuar më së shumti në këtë fazë dhe se është mirënjohës për këtë.
“Në Vjenë, në ambientet e ambasadës sonë, bashkë me ambasadorin, z.Lulzim Pllana kemi zhvilluar takime të ndara, me miqtë e mëdhenj të Kosovës, euro deputetin z. Lukas Mandl, z. Erhard Busek, z. Gerhard Gretzl, znj. Elisabeth Campestrini, z. Gerhard Knorr dhe z. Wolfgang Schaffer. Takimet ishin shumë të vlershme, jo vetëm për të diskutuar për përkrahjen që e marrim aktualisht nga Austria në Parlamentin Evropian dhe institucionet tjera të BE-së, por edhe me përkrahjen që e jep ky vend mik për shtetin dhe qytetarët tanë në shumë fusha
Situata e pandemisë ka ndikim të fuqishëm në aktivitetet tona, andaj, takimi im me z. Mandl, z. Busek, dhe miqtë tjerë, anëtarë të grupeve punuese dhe raportuese për Kosovën në PE dhe organizatat e tjera ndërkombëtare, është i lidhur ngushtë me përkrahjen që kanë ofruar ata në institucionet vendore dhe ndërkombëtare si dhe organizatat shëndetësore.
Në takimin me z. Gerhard Gretzl, znj. Elisabeth Campestrini, z. Gerhard Knorr dhe z. Wolfgang Schaffer, u rikonfimua mbështetja dhe përkrahja e mëtejme jo vetëm në fushën e shëndetësisë por edhe në atë të edukimit, infrastrukturës dhe në shumë fusha të tjera.
Gjatë qëndrimit zyrtar në Vjenë, kisha kënaqësinë të takoj edhe dy miq të mëdhenj të vendit tim, konsuj nderi z. Manfred Brander dhe z. David Ungar-Klein, takim gjatë të cilit theksova falënderimin tim për promovimin e shtetësisë dhe nevojave të Kosovës në institucionet ndërkombëtare për qytetarët tanë, por edhe duke cekur në takime vështirësitë dhe padrejtësinë që i bëhet Kosovës me liberalizimin e vizave.
Faleminderit për angazhimin tuaj, të nderuar miq të Kosovës, jemi të bekuar me miqësinë tuaj!
Faleminderit ambasador z.Pllana dhe gjithë stafit për punën dhe përkushtimin tuaj” shkruan Zemaj në njoftim.
