VV: Elementi që nuk ka qenë objekt as i kërkesës sonë, nuk është gjë tjetër veçse dashakeqësi

Juristi i Lëvizjes Vetëvendosje, Besnik Sallahu, e ka quajtur fitore vendimin e Kushtetueses për votën e deputetit Ethem Arifi, ndërkohë që për ta është i papranueshëm mos lejimi kandidatëve për deputet që janë të dënuar me kusht.

“Lëvizja Vetëvendosje e ka kontestuar vendimin e Kuvendit  për zgjedhjen e qeverisë me pretendimin se Qeveria ishte antikushtetuese, e paligjshme që nuk ishte votuar me  61 vota siç parashihet me Kushtetutë. Sot, Gjykata Kushtetuese publikoi Aktgjykimin e plotë duke vërtetuar plotësisht pretendimet tona për antikushtetutshmërinë e zgjedhjes se kinse-qeverisë Hoti. Kësisoj po shkojmë drejtë zgjedhjeve të reja parlamentare që do të mbahen në afatin e përcaktuar kushtetues, pasi ushtruesja e detyrës të marrë vendimin për shpalljen e zgjedhjeve”, ka shkruar Sallahu në një postim në Facebook.

Ai ka thënë se aktgjykimi i Gjykatës Kushtetuese në përmbajtje shpreh rrethanat e rastit konkret te humbjes se mandatit për të dënuarin me burg,  z.Arifi.  Pra për shkak se i njëjti ishte dënuar më burgim efektiv sipas një dënimi të formës së prerë.

“Devijimi i krejt përmbajtjes së këtij Aktgjykimi të zyrtarizuar sot tek një element që nuk ka qenë objekt as i kërkesës sonë e as Gjykatës Kushtetuese nuk është gjë tjetër veçse dashakeqësi. Këto rrethana nuk mund të vlejnë në raste të tjera  për faktin se aktgjykimi i Gjykatës Kushtetuese nuk ka efekt prapaveprues në këtë rast”, ka thënë Sallahu.

Sipas tij në lidhje me këtë, kandidatët e tjerë që janë dënuar me dënim me kusht në vitin 2018 janë lejuar të kandidojnë në zgjedhjet parlamentare. Në atë kohë kufizimi nuk ka ndodhur për shkaqe që tashmë dihen e që janë në përputhje me ligjet në fuqi.

Sallahu ka vënë në pah se kur ndodh, kufizimi për të mos kandiduar do të duhet të jetë “kufizim i pandërprerë” për aq sa janë afatet ligjore e kushtetuese. Përndryshe çdo veprim tjetër nga autoritetet përkatëse, do të ishte në kundërshtim me parimin e drejtës së fituar, i cili është parim i përgjithshëm i së drejtës ndërkombëtare publike dhe i rrënjosur si element i sundimit të ligjit brenda përmbajtjes së rendit kushtetues të përcaktuar në Kushtetutën e Kosovës.

“Të vepruarit ndryshe do të ishte në kundërshtim flagrant me nenin 7, 33 dhe 45 të Kushtetutës së Kosovës si dhe me konventat dhe aktet ndërkombëtare përkatëse. Andaj rasti i tillë nuk mund të vlejë për kandidatët që kanë pasur vendime për dënime alternative”, përfundon vlerësimin e tij Sallahu.