Hoti: Kosova nuk do të përkrahë mentalitetin komunist më 14 shkurt
Kandidati i LDK-së për kryeministër, Avdullah Hoti, tha të hënën në tubimin elektoral në Obiliq, se LDK-ja është alternativa e vetme që e ruan shtetin e Kosovës dhe kursin e saj evropian.
“Shihni këta oponentët tanë si po dalin rrugëve me megafon, e me shirita të kuq që janë shenjë e komunizmit, shenjë e regjimeve totalitare. Më 14 shkurt të gjithë duhet ta kuptojnë se Kosova nuk mbështet mentalitetin komunist, por e mbështet mentalitetin zhvillimor evropian që përfaqësohet nga LDK-ja”, tha Hoti.
Kandidati i LDK-së, foli edhe programin e kësaj partie në zgjedhje, duke u zotuar se Qeveria e re do të vazhdojë mbështetjen për Komunën e Obiliqit.
“Obiliqi është vend që i jep energji gjithë Kosovës, i jep ngrohjen Prishtinës, prandaj qytetarët e Kosovës i kanë borxh Obiliqit dhe do ta kenë përkrahjen e Qeverisë ashtu siç e kanë pasur deri tani nga Qeveria e drejtuar nga LDK-ja”, tha Hoti.
Ai kërkoi nga të gjithë që më të bashkuar se kurrë, t’i japin mbështetje LDK-së në zgjedhjet e 14 shkurti, sepse vetëm në këtë mënyrë bëhet e mundur ruajtja e shtetit dhe zhvillimi i tij.
“Jam këtu për të kërkuar besimin për të quar përpara misionin e shenjtë të ndërtimit të shtetit, mision i nisur 31 vjet më parë. Ky mision destinacion, e ka anëtarësimin e Kosovës në Bashkimin Evropian dhe në NATO. Ne e kemi dëshmuar se mund ta bëjmë këtë. E kemi marrë Qeverinë me sanksione amerikane dhe kemi përmbyllur vitin me marrëveshjen që i sjell Kosovës 1 miliard euro investime, që i solli njohjen nga Izraeli. Po ashtu, viti është përmbyllur edhe me vendimin që FSK-ja si pjesë e ushtrisë amerikane të shkojë në misione paqeruajtëse në botë”, tha Hoti.
