PZAP urdhëron verifikimin e rezultateve edhe për një kandidate të AAK-së
Paneli Zgjedhor për Ankesa dhe Parashtresa ka pranuar si të bazuar ankesën e kandidates së Aleancës për Ardhmërinë e Kosovës, Florentina Gjergjaj për rinumërimin e votave.
Nga shkresat e lëndës rezulton se Florentina Gjergjaj, kandidate për deputete nga radhët e AAK-së ka paraqitur apel me të cilin ka kërkuar që të rinumërohen fletëvotimet me kusht dhe flertëvotimet nga diaspora.
Gjergjaj kishte kërkuar verifikimin e të gjitha rezultateve që gjë është pranuar nga PZAP-ja.
“Pranohet i bazuar apeli me numër Anr.581/2021 i 04.04.2021 i parashtruar nga Florentina Gjergjaj, kandidate për deputete nga radhët e subjektit politik Aleancës për Ardhmërinë e Kosovës, paraqitur kundër vendimit të Komisionit Qendror të Zgjedhjeve(KQZ), nr,860/2021 të 04.04.2021 me të cilën ka kërkuar verifikimin e rezultateve të nxjerra gjatë numërimit dhe rinumërimit për zgjedhjet e parakohshme për Kuvendin e Republikës së Kosovës të mbajtura më 14.02.2021”, thuhet në vendim.
Po ashtu PZAP-ja ka urdhëruar Komisionin Qendror i Zgjedhjeve, që të rinumërohen fletëvotimet me kusht në të gjitha komunat e Kosovë dhe gjitha fletëvotimet nga diaspora vetëm sa u përket kandidatëve nga radhët e AAK-së.