Musliu-Gervallës: Ju heshtët kur para syve të botës homologu juaj serb e quajti UÇK-në organizatë terroriste

Deputetja e Partisë Demokratike të Kosovës (PDK), Ariana Musliu Shoshi ka thënë se ministrja e Punëve të Jashtme, Donika Gërvalla duhet ta lë anash politikën e brendshme në takimet jashtë shtetit.

Ajo deklaroi se Kosova nuk duhet të heshtë përballë akuzave të Serbisë dhe Rusisë, se Kosova është shtet kriminal, korruptiv, që eksporton jostabilitet politik dhe terrorizëm.

“Zonja ministër në diplomaci duhet dish mirë se në çfarë instanca flet dhe cili është qëllimi i takimit tuaj. Qëllimi i takimit në OKB është forcimi iu shtetësisë së Kosovës në arenën ndërkombëtare dhe dërgimi i sinjaleve të qarta se Kosova është një shtet që meriton të njohët ndërkombëtarisht dhe duhet të arrish që të përballesh me Serbinë dhe Rusinë, kur dihet që Serbia ka një pozicion të favorshëm në rajon, e jo ta përkrahësh në vazhdimësi narrativen që ka krijuar Serbia për Kosovën, që është një shtet kriminal dhe i korruptuar. Që eksporton jostabilitet politik dhe terrorizëm. Nuk përmend gjëra aq të tilla të pavërteta në një pozicion aq të favorshëm kur je përballë Rusisë dhe Serbisë dhe kur ke interesa nacionale përpara, politika e brendshme duhet të shkëputet nga politika e jashtme”, ka thënë ajo.

Më tutje deputetja e PDK-së tha se kryediplomatja ka heshtur edhe kur diplomati serb e quajti UÇK-në organizatë terroriste.

“Zonja ministre fatkeqësisht sot e kemi Gjykatën Speciale që po e akuzon Kosovën për krime lufte derisa Serbia e ka përmbyll këtë kapitull me Gjykatën e Hagës. Homologu juaj serbë para syve të botës i’u drejtua me një varg akuzash e që ja u quajti UÇK-në organizatë terroriste dhe disa akuza të pavërteta sa i përket Gjykatës Speciale. Ju heshtët”, ka thënë ajo.

Ajo e përmendi edhe deklaratën e Gërvallës ku i përmendi krimet e Gjermanisë naziste edhe ndaj Serbisë.