Reagon SHBA, BE dhe MB pas krizës në Jeruzalem

Vendet në të gjithë botën kanë apeluar për qetësi pas trazirave disa ditësh me sulme hakmarrëse nga Izraeli dhe Palestinezët.

SHBA, Bashkimi Evropian dhe Mbretëria e Bashkuar kanë nxitur Izraelin dhe Palestinezët të ulin tensionet sa më shpejt të jetë e mundur, transmeton Indeksonline.

Dhuna u përshkallëzua të hënën në mbrëmje pasi militantët palestinezë hapën raketa drejt Jeruzalemit.

Si përgjigje, ushtria izraelite nisi sulmet ajrore kundër caqeve të militantëve në Rripin e Gazës.

Zyrtarët palestinezë të shëndetësisë në Gaza thanë se 22 persona, përfshirë fëmijë, kishin vdekur gjatë atyre sulmeve. Ushtria e Izraelit tha të paktën 15 anëtarë të grupit Hamas që sundon Gaza ishin midis të vrarëve.

Hamas kishte kërcënuar të godiste pasi qindra palestinezë u plagosën në përleshjet me policinë izraelite në një vend të shenjtë në Jeruzalem të hënën.

Kryeministri i Izraelit, Benjamin Netanyahu tha se Hamasi kishte “kaluar një vijë të kuqe” dhe se Izraeli do të përgjigjej “me forcë të madhe”.

Përballje gjithnjë e më të dhunshme janë parë mes policisë izraelite dhe protestuesve palestinezë në një kompleks në Qytetin e Vjetër të Jeruzalemit.

Palestinezët janë zemëruar për kufizimet në hyrjen në kompleks, ku është vendosur xhamia Al-Aqsa – vendi i tretë më i shenjtë në Islam – së bashku me Malin e Tempullit – vendi më i shenjtë në Judaizëm.

Të martën në mëngjes, Gjysmëhëna e Kuqe Palestineze, një grup humanitar, tha se më shumë se 700 palestinezë ishin plagosur nga përleshjet me forcat izraelite të sigurisë në Jeruzalem dhe përtej Bregut Perëndimor, raporton BBC./Indeksonline/