Paneli amerikan rekomandon që vaksinat e J&J të anashkalohen pas vdekjeve nga mpiksja e gjakut
Një panel ekspertësh amerikanë ka votuar njëzëri për të rekomanduar vaksinat Pfizer dhe Moderna kundër Covid-19 dhe jo Johnson & Johnson’s, të cilat janë lidhur me efekte anësore vdekjeprurëse.
Sipas Qendrës Amerikane për Kontrollin dhe Parandalimin e Sëmundjeve (CDC), gjithsej 57 pacientë të J&J kanë zhvilluar një çrregullim të rrallë të mpiksjes së gjakut.
Deri më tani dihet se kanë vdekur nëntë persona: shtatë gra dhe dy burra.
Një total prej 16 milionë banorësh të SHBA-së kanë marrë vaksinën me një dozë të vetme J&J, shkruan BBC.
Të enjten, Komiteti Këshillimor për Praktikat e Imunizimit (ACIP) rekomandoi që vaksina J&J të rezervohet për rastet kur pacientët nuk janë në gjendje ose nuk dëshirojnë të marrin ilaçet më të disponueshme Pfizer dhe Moderna.
CDC duhet ende të vendosë nëse do të pranojë rekomandimin e panelit.
Efekti anësor i mpiksjes së gjakut mbetet i rrallë, me zyrtarët federalë të shëndetësisë që vlerësojnë se është raportuar në një normë prej 3.8 në një milion doza të dhëna.
Nga 57 raste të konfirmuara, 36 janë pranuar në njësitë e kujdesit intensiv. Të vdekurit varionin nga mosha 28 deri në 62 vjeç, me obezitetin si problem kryesor shëndetësor.
Të gjitha rastet e deritanishme kanë ndodhur brenda një muaji pas marrjes së vaksinës, shumica dërrmuese pas nëntë ditësh.
Përdorimi i vaksinës J&J u ndërpre përkohësisht në prill për shkak të shqetësimeve për mpiksjen e gjakut.
CDC ka vënë në dukje se përdorimi i vaksinës parandaloi mijëra shtrime në spital të lidhura me COVID-19, krahasuar me një numër relativisht të vogël njerëzish që përjetuan efektet anësore.
Statistikat më të fundit të CDC tregojnë se mbi 76% e banorëve të SHBA-së mbi moshën pesë vjeç kanë marrë të paktën një dozë të vaksinave kundër COVID-19.
