Zbulohen vrasje masive në Mianmar

Ushtria e Mianmarit kreu një seri vrasjesh masive të civilëve në korrik që rezultuan në vdekjen e të paktën 40 burrave.

Dëshmitarët okularë dhe të mbijetuarit thanë se ushtarët, disa të rinj deri në 17 vjeç, mblodhën fshatarët përpara se t’i ndanin burrat dhe t’i vrisnin, shkruan BBC. 

Pamjet video dhe imazhet nga incidentet duket se tregojnë se shumica e të vrarëve u torturuan fillimisht dhe u varrosën në varre të cekëta.

Vrasjet ndodhën në korrik, në katër incidente të veçanta në Kani Township, një bastion i opozitës në distriktin Sagaing në Mianmarin Qendror.

Ushtria është përballur me rezistencën e civilëve që kur mori kontrollin e vendit në një grusht shteti në shkurt, duke rrëzuar një qeveri të zgjedhur në mënyrë demokratike, të udhëhequr nga Aung San Suu Kyi.

Vrasja më e madhe ndodhi në fshatin Yin, ku të paktën 14 burra u torturuan ose u rrahën për vdekje dhe trupat e tyre u hodhën në një gropë në pyll, transmeton Indeksonline.

Në fshatin Zee Bin Dwin aty pranë, në fund të korrikut, 12 trupa të gjymtuar u gjetën të varrosur në varre masive të cekëta, duke përfshirë një trup të vogël.

Vrasjet dukej se ishin një dënim kolektiv për sulmet ndaj ushtrisë nga grupet e milicisë civile në zonë, të cilët po kërkojnë rivendosjen e demokracisë. 

Luftimet midis ushtrisë dhe degëve lokale të Forcës së Mbrojtjes Popullore ishin intensifikuar në zonë në muajt para vrasjeve masive.