Ahmeti: Kosovarët duhet të kenë më shumë njohuri se si të veprojnë në rast të ndonjë tërmeti

Tahir Ahmeti, njohës i çështjeve të emergjencave dhe njëherësh Drejtor Ekzekutiv i Qendrës Kërkimore për Politika të Sigurisë, ka thënë se kosovarët duhet të dinë më shumë rreth tërmeteve dhe si të veprojnë kur ndodhin.

Sipas tij, edukimi shoqëror për tërmetet është shumë i nevojshëm.

“Duhet të mësohet se si të mbrohemi dhe si duhet të veprojmë në rast të ndonjë tërmeti të mundshëm, në mënyrë që pasojat të jenë sa më të vogla” ka shkruar Ahmeti.

Ky është shkrimi i plotë i tij:

Kohëve të fundit në disa shtete përreth Kosovës kemi pasë lëkundje të tokës, të njohura si tërmete, lëkundje këto që në shumë raste janë ndjerë edhe në vendin tonë.

Tërmetet nuk mund të parashikohen apo parandalohen, por mendoj se edhe tek ne është mjaft i nevojshëm apo edhe i domosdoshëm edukimi shoqëror për tërmetet. Ky edukim duhet filluar që nga shkollat, por edhe më gjerë, në mënyrë që sa më shumë qytetarë të kenë informacione dhe njohuri për tërmetet.

Duhet të mësohet se si të mbrohemi dhe si duhet të veprojmë në rast të ndonjë tërmeti të mundshëm, në mënyrë që pasojat të jenë sa më të vogla.