Rusia kërcënon Japoninë me “masa hakmarrëse”

Rusia ka paralajmëruar Japoninë dhe ka kërcënuar me “masa hakmarrëse” nëse stërvitjet e përbashkëta detare me Shtetet e Bashkuara zgjerohen në kufijtë lindorë të Rusisë.

Ky kërcënim është vetëm një vazhdim i konfliktit Moskë-Tokio.

Moska është e zemëruar sepse Japonia i ka dhënë mbështetje të qartë Ukrainës dhe po afrohet më shumë me vendet anëtare të NATO-s.

Rusia dhe Japonia, në fakt, kanë marrëdhënie të pazgjidhura që nga fundi i Luftës së Dytë Botërore për shkak të ishujve që atëherë u pushtuan nga forcat sovjetike.

Zëvendësministri i Jashtëm rus Igor Morgulov tha të martën se stërvitjet detare amerikano-japoneze ishin “në natyrë potencialisht ofenduese”, shkruan Indeksonline.

“Ne i shohim veprime të tilla të palës japoneze si një kërcënim për sigurinë e vendit tonë”, tha Morgulov.

“Nëse një praktikë e tillë përhapet, Rusia do të marrë masa hakmarrëse në interes të forcimit të aftësive të saj mbrojtëse”, tha ai.

Marina amerikane dhe japoneze përfunduan stërvitjet e përbashkëta në Detin e Kinës Lindore dhe Detin Filipine javën e kaluar.

Më herët gjatë muajit, ushtria amerikane kreu stërvitje të përbashkëta të ngjashme në Detin e Japonisë, ku Rusia ka një vijë të gjatë bregdetare.

Sipas Marinës së SHBA-së, SHBA-të dhe Japonia mbajnë në mënyrë rutinore stërvitje të përbashkëta detare në Indo-Paqësorin për të “ruajtur stabilitetin në rajonin e lirë dhe të hapur Indo-Paqësor”./Indeksonline/