Alarmi për bombë, policë me armë të gjata patrullojnë në ambientin e Aeroportit të Prishtinës

Një kërcënim i rremë për bombë në aeroportin e Prishtinës “Adem Jashari” ka vënë në lëvizje forcat e Policisë së Kosovës.

Indeksonline ka siguruar pamje nga Aeroporti. Aty shihen pjesëtarë të PK-së me armë të gjata duke patrulluar në ambientet e Aeroportit.

Kujtojmë se Policia pas alarmit ka ndërmarrë masat e nevojshme për ta siguruar lokacionin, derisa ka evakuuar edhe personat që ndodheshin në aeroport.

Zëdhënësja e aeroportit të Prishtinës, Valentina Gara bëri të ditur se “se janë ndërmarrë të gjitha veprimet operative dhe hetimore nga organet kompetente të Republikës së Kosovës dhe ka rezultuar se kërcënimi me bombë ka qenë alarm i rremë. Aeroporti Ndërkombëtar i Prishtinës ‘Adem Jashari’ është i hapur për fluturime, dhe të gjitha fluturimet do të procesohen si zakonisht!”

Ndërsa, kjo nuk është hera e parë që ka pasur kërcënime për bombë në këtë aeroport, ndërkohë që të gjithë kanë rezultuar alarme të rremë.

Në disa shkolla në veri të Kosovës është ndërprerë disa herë procesi mësimor. Kjo për shkak të mesazheve anonime kërcënuese sipas të cilave në këto shkolla ishin vendosur bomba. /Indeksonline/