Fitorja e 12-të radhazi në Serie A, Napoli mposht edhe Empolin

Napoli po vazhdon me formën e lartë këtë sezon, teksa sonte regjistroi edhe fitoren e 12-të radhazi në Serie A.

Skuadra e drejtuar nga Luciano Spalletti gjithashtu vazhdon të jetë e vetmja pa humbje këtë sezon, shkruan Gazeta Express.

Në ndeshjen e vlefshme për javën e 14-të, napolitanët shënuan fitore të pastër kundër Empolit.

Ndeshja e zhvilluar sonte në stadiumin “Diego Armando Maradona” përfundoi me rezultatin 2:0.

Hirving Lozano nga penalltia në minutën e 69-të dhe Piotr Zielinski në minutën e 88-të shënuan golat e fitores për vendasit.

Mysafirët luajtën me një lojtar më pak nga minuta e 74-të, pasi Sebastiano Luperto u përjashtua nga loja me kartonin e dytë të verdhë.

Dyshja shqiptare, Ardian Ismajli dhe Nedim Bajrami, u paraqiten për 90 minuta.

Napoli pas kësaj fitore ka 38 pikë dhe vazhdon kryesimin në tabelë, kurse Empoli ndodhet në pozitën e 14-të me 14 pikë.