Shefi i policisë rrugore flet për IndeksOnline: Kemi shtuar prezencën në rrugë, numri i aksidenteve po bie nga viti në vit

Vetëm gjatë vitit të kaluar, 106 persona kanë humbur jetën në aksidente trafiku, përderisa mbi 14 mijë të tjerë kanë marrë lëndime trupore. Ndonëse gjatë javës së kaluar humbën jetën 7 qytetarë të Kosovës në aksidente, të dhënat e policisë rrugore flasin se këtë vit (janar-shkurt) ka më pak aksidente fatale se vitin e kaluar në këtë periudhë. Në dy muajt e parë të këtij viti kanë ndodhur 13 aksidente fatale me 18 të vdekur përderisa në periudhën e njëjtë të vitit 2022, kanë ndodhur 17 aksidente fatale me 21 të vdekur.

Këtë e ka bërë të ditur shef i Divizionit për Komunikacionin Rrugor në Policinë e Kosovës, Jeton Rexhepi, ku tha se vetaksidentet po shënojnë rritje çdo vit e më shumë.

“Edhe pse javën e fundit kishim një numër të madh të aksidenteve, sidomos atyre me fatalitet, por nëse i referohemi të dhënave të këtij viti për muajin janar dhe shkurt, krahasuar me periudhën e njëjtët të vitit të kaluar, numri i aksidenteve me fatalitet ka shënuar rënie. Po ashtu, numri i aksidenteve më lëndime ka pësuar rënie. Çka është më rendësi që numri angazhimeve, prezencës policore qoftë më projekte apo mesazhe, por edhe patrullimit në lëvizje ka qenë dukshëm më i madh se sa muajt paraprakë”, ka thënë Rexhepi.

Por, pse gjithë këto aksidente gjatë javëve të fundit, Rexhepi ka treguar se problemi më i madh qëndron tek faktori njeri por edhe tek infrastruktura në Kosovë.

Sipas tij, aksidentet ndodhin më së shumti në rrugët nacionale, ku edhe mundësohet ngasja e veturës më shpejtësi më të madhe.

“Një përqindje shumë më të madhe, atë mbi 80% e merr faktori njeri, qoftë cilësitë e shoferit, cilësitë e pjesëmarrësit në trafikun rrugor, qoftë si pasagjer apo edhe këmbësorë, por edhe drejtues i mjeteve tjera. Pjesa tjetër që është më rendësi është infrastruktura rrugore dhe elementet e saj përcjellëse”, ka thënë Rexhepi.

Shefi i Policisë së Trafikut gjithashtu tha se numri i gjobave ka pësuar rritje prej 33% gjatë vitit 2022.

“Policia e Kosovës bën edhe pjesën e zbatimit të ligjit, sidomos të rregullave të trafikut rrugor dhe për këtë i referohemi më të dhënat që i ka identifikuar këto kundërvajtje dhe mund të themi që viti 2022 ka shënuar rritje të gjobave diku me 33% krahasuar me vitin paraprak”, ka thënë ai.

Para pak muajve Policia e Trafikut ka prezantuar disa vetura digjitale, por sa janë treguar ato efikase Rexhepi ka thënë që janë në fazat e para të këtij projekti, por thotë se gjatë vitit të ardhshëm të pajisjen më më shumë pajisje digjitale.

“Ne jemi në fazat e para të digjitalizimit të pajisjeve, d.m.th. jemi vetëm në fillim të këtij projekti. Normal çdo pajisje e re e cila të mundëson identifikimin e kundërvajtjes është lehtësim për policinë, meqenëse të gjitha kundërvajtjet mund t’i sheh të cilat i ka shkel pak sekonda më herët”, ka pohuar Rexhepi.

Shef i Divizionit për Komunikacionin Rrugor në Policinë e Kosovës ka thënë se një kërkesë e vazhdueshme e Policisë ka qenë edhe monitorimi i komunikacioni përmes kamerave (radar statik). Sipas tij, vendosja e kamerave do të duhej të fillonte prej rrugëve nacionale, aty ku ka më shumë kundërvajtje./IndeksOnline/