Komuna e Pejës publikon listën e dëmeve nga vërshimet, 70 mijë euro për familjen Ademaj që humbi dy anëtarë (Dokument)
![](https://indeksonline.net/wp-content/uploads/2023/09/356947163_665654988765320_8293142514629888018_n.jpg)
Shiu i madh i 24 qershorit në Pejë shkaktoi humbje jetësh dhe dëme të jashtëzakonshme materiale.
Një nënë bashkë me djalin e saj pesë vjeçar kanë humbur jetën pasi uji depërtoi në shtëpinë e tyre në lagjen “Asllan Qeshme”.
Dhjetëra biznese dhe shtëpi u demoluan nga vërshimet, teksa pati edhe vetura të rrotulluara dhe të shkatërruara.
Dy ditë pas tragjedisë është hapur afati për parashtrimin e kërkesave të dëmeve nga vërshimet.
Nga ajo kohë, Komuna e Pejës ka qenë duke bërë vlerësimin e dëmeve materiale të shkaktuara.
Indeksonline raporton se numri i bizneseve të dëmtuara është afro 100, teksa ka edhe familje që kanë lajmëruar në Komunë se u janë dëmtuar automjetet dhe shtëpitë.
Nga gjithsej 93 biznese që janë goditur nga vërshimet e asaj dite, vlera e dëmit raportohet të ketë arritur në 1.087.982 euro.
Dy biznese kanë pësuar dëmet më të mëdha e që arrijnë shifrën prej 250 mijë eurosh.
Në anën tjetër, Indeksonline raporton se në bazë të të dhënave të mbledhura, vlera e automjeteve që janë dëmtuar nga kjo fatkeqësi natyrore është 187.450 euro.
Dëmi më i madh në numër është shkaktuar në ekonomitë familjare.
Sipas të dhënave, 329 familje janë lajmëruar në Komunë për të regjistruar dëmin e shkaktuar në shtëpitë e tyre.
Vlera totale e këtij dëmi kap shifrën prej 756 mijë e 841 eurosh, raporton Indeksonline.
Dëmet e shkaktuara në disa ekonomi familjare arrijnë deri në 40 mijë euro.
Goditjen më të madhe të këtyre vërshimeve e mori familja Ademaj, e cila humbi dy anëtarë.
Sipas vlerësimit të Komunës së Pejës, familjes Ademaj i është shkaktuar dëm prej 70 mijë eurosh nga kjo fatkeqësi.
Ndërkohë, kryetari i Pejës, Gazmend Muhaxheri, pas vërshimeve kishte deklaruar se dëmet e tilla nuk mund t’i përballonte buxheti komunal.
Vërshime të mëdha në vend pati edhe në janar të këtij viti, ku Rrafshi i Kosovës u godit nga reshje të mëdha. Qytete si Skenderaji, Juniku, Klina e Mitrovica u përballen me vërshime të mëdha, të cilat shkaktuan dëme të jashtëzakonshme, dëme këto të cilat Qeveria nuk i ka kompensuar akoma.
Më poshtë lista e plotë e dëmëve të regjistruara nga Komuna./Indeksonline/
![](https://indeksonline.net/wp-content/uploads/2023/09/image-142.png)
![](https://indeksonline.net/wp-content/uploads/2023/09/image-143.png)
![](https://indeksonline.net/wp-content/uploads/2023/09/image-144.png)
![](https://indeksonline.net/wp-content/uploads/2023/09/image-145.png)
![](https://indeksonline.net/wp-content/uploads/2023/09/image-146.png)
![](https://indeksonline.net/wp-content/uploads/2023/09/image-147.png)
![](https://indeksonline.net/wp-content/uploads/2023/09/image-148.png)
![](https://indeksonline.net/wp-content/uploads/2023/09/image-150.png)
![](https://indeksonline.net/wp-content/uploads/2023/09/image-151.png)
![](https://indeksonline.net/wp-content/uploads/2023/09/image-152.png)
![](https://indeksonline.net/wp-content/uploads/2023/09/image-153.png)