Ky është personi që sulmoi fizikisht punëtorin e Prishtina Parkingut

Një person është sulmuar fizikisht në vendin e punës të enjten që lamë pas në Prishtinë. Punëtori i Ndërmarrjes Publike Prishtina Parking u sulmua gjersa po kryente punën e tij ndaj një shkelësi të rregullave të parkingut publik.

Burime të Indeksonline bëjnë të ditur se personi që sulmoi fizikisht punëtorin është Gazmend Demolli. Pavarësisht veprës së bërë, i njëjti është liruar më pas nga organet e rendit.

Për këtë rast ka reaguar edhe “Prishtina Parkingu”.

“Nëpërmjet kësaj komunikate, shprehim shqetësimin tonë të thellë lidhur me sulmin nga një qytetar ndaj punonjësve tejet të zellshëm të N.P.L. “Prishtina Parking”.
Sulmi ka ndodhur më datën 13 Tetor 2023, në rrugën “Johan V Hahn” në Prishtinë. Për këtë sulm janë njoftuar Policia e Kosovës, si dhe u janë ofruar pamjet të cilat në mënyrë tejet të qartë paraqesin sjelljen tejet korrekte dhe profesionale të zyrtarëve tanë ndaj qytetarit në fjalë, e po ashtu paraqesin sulmin brutal dhe të paprovokuar nga qytetari ndaj zyrtarit të N.P.L. “Prishtina Parking”.
Megjithatë është tejet e çuditshme dhe shqetësuese se përkundër pamjeve dhe raportimit të rastit nga zyrtarët e sulmuar, institucionet ligjzbatuese kanë lënë të lirë sulmuesin.
Zyrtari ynë ka qenë në orarin e punës duke realizuar kontrolle në zonën e cila si hapësirë është e dizajnuar si parking vetëm për banorët rezidentë. Jemi të indinjuar nga ky sulm, e po ashtu nga reagimi i institucioneve përgjegjëse, sidomos për faktin se zyrtari ynë ka qenë duke e kryer detyrën, që e lehtëson qasjen në parking për banorët e lagjes në fjalë, që karakterizohet si pjesë me ngarkesë.
Nga N.P.L. “Prishtina Parking” i bëjmë apel institucioneve ligjzbatuese për mos tolerim të sulmeve të tilla dhe që sulmuesi të marrë dënimin e merituar nga organet e rendit. Cenimi i tillë i integritetit profesional e personal ndaj zyrtarëve që kanë përkushtim të thellë për të siguruar shërbime cilësore ndaj qytetarëve, është i papranueshëm. Sulme të tilla cenojnë edhe funksionimin normal të ndërmarrjes” thuhet në reagimin e ndërmarrjes./Indeksonline/