Zv.komandanti i KFOR-it vizitoi kontingjentin armen në aeroportin ushtarak: Janë çelësi i suksesit tonë

Zëvendëskomandanti i misionit të KFOR-it të udhëhequr nga NATO-ja, gjeneralbrigade Federico Bernacca, e ka vizituar sot aeroportin ushtarak të Sllatinës, i cili shërben si port ajror i debarkimit të KFOR-it, njoftoi misioni paqeruajtës përmes një komunikate për media.

“Në emër të KFOR-it, falënderoj mbrojtësit tanë në aeroportin ushtarak të Sllatinës, për profesionalizmin, përkushtimin dhe shërbimin e paçmuar, të cilat janë çelësi i suksesit të misionit tonë”, tha zëvendëskomandanti i KFOR-it.

KFOR-i thotë se “vizita e gjeneralit Bernacca përfshinte një përshkrim të detajuar të infrastrukturës së sigurisë së aeroportit, një vlerësim të procedurave operacionale, një vlerësim të përmirësimeve të fundit të bëra në protokollet e sigurisë dhe diskutime me personelin kryesor përgjegjës për menaxhimin e përditshëm të masave të mbrojtjes së forcave”.

KFOR-i, si zakonisht rikujton se vazhdon ta zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të ofruar një mjedis të sigurt për të gjitha komunitetet që jetojnë në Kosovë dhe lirinë e lëvizjes, në çdo kohë dhe në mënyrë të paanshme.