Komuna e Mitrovicës Veriore fton qytetarët për diskutim të hapur, të pranishëm ministri Krasniqi, Veton Elshani e Erden Atiqi

Komuna e Mitrovicës së Veriut ka ftuar shoqërinë civile, mediat lokale, aktivistët dhe të gjithë të interesuarit që të marrin pjesë në debatin, i cili do të mbahet nesër në sallën e Kuvendit të Komunës.

Tema e takimit është “Bashkëpunimi ndëretnik, Komiteti Komunal për Siguri në Bashkësi, bashkëpunimi ndërmjet institucioneve dhe shoqërisë civile”, thuhet në deklaratën e Komunës së Mitrovicës së Veriut.

Fillimi i takimit është caktuar për në orën 11:00, ku para të pranishmëve fillimisht do t’i drejtohet ministri i Kosovës për Vetëqeverisje Lokale, Elbert Krasniqi.

Pas Krasniqit, fjalim do të kenë kryetari i kësaj komune, Erden Atiq, zëvendësja e tij, Katarina Adjançiq, zëvendëskomandanti i Policisë së Kosovës për rajonin e Veriut, Veton Elshani, si edhe Jeta Tela shefe e kabinetit dhe këshilltare e lartë politike në Ministrinë e Punëve të Brendshme.

Pas fjalimit të tyre, nga ora 11:50 deri në 12:50, do të ketë një debat të hapur ku, sipas komunës, zyrtarët do t’u përgjigjen të gjitha pyetjeve që kanë të bëjnë me temën e takimit.