Hoti akuzon Kurtin e Pecin: Bujqësia, dështim total!

Deputeti i LDK-së Avdullah Hoti, ka vazhduar kritikat në adresë të Qeverisë së Kosovës, sa i përket gjendjes në bujqësi.  Hoti ka thënë se për katër vjet qeverisjeje sektori i bujqësisë nuk pasur asnjë zhvillim dhe se është një dështim total në këtë sektor.

“E vërteta është se bujqësia nuk po zhvillohet. Nuk ka investime në rritjen e tokave bujqësore nën ujitje. Nuk ka kreditim me kushte të volitshme për investime bujqësore. Nuk ka investime në teknologjinë e ruajtjes dhe përpunimit të ushqimeve”, ka shkruar Hoti në Facebook.

Postimi i plotë i Hotit:

Bujqësia 2021-2024: Dështim total

Dështimet në bujqësi në tri tabela:

– TABELA 1: Gjatë mandatit 2021-2024, janë shpenzuar 252.7 mil euro në subvencione bujqësore (për 2024 janë në shpenzim e sipër).

– TABELA 2:

Në 2023, krahasuar me 2020, numri i kafshëve, shpezëve dhe bletëve, si dhe i sipërfaqeve të kultivuara ka rënë, me përjashtim të numrit të shpezëve dhe sipërfaqeve me pemishte.

– TABELA 3:

– Në 2023, krahasuar me 2019, importet e mallrave kryesore ushqimore janë rritur për 72% (apo për 455 mil euro): për kafshë të gjalla 339%, për mish 43%, bylmet e vezë 61%, perime 78%, e kështu me radhë.

Edhe pas eliminimit të efektit të inflacionit në vlerën e importeve, sërish rritja mbetet e madhe. (Bazë krahasuese është marrë viti 2019 pasi në vitin 2020 ka pasur kufizime në tregti shkaku i pandemisë.)

Pyetjet legjitime janë këto:

1. Përse ka rënie në sipërfaqet e mbjella?

2. Përse ka rënë numri i kafshëve, shpezëve e bletëve?

3. Çfarë po ndodh me prodhimin vendor – përse po importojmë më shumë ushqime kur kemi dukshëm më pak qytetarë rezidentë?

4. Cili është ndikimi i 252.7 mil euro të shpenzuara në subvencione?

E vërteta është se bujqësia nuk po zhvillohet. Nuk ka investime në rritjen e tokave bujqësore nën ujitje. Nuk ka kreditim me kushte të volitshme për investime bujqësore. Nuk ka investime në teknologjinë e ruajtjes dhe përpunimit të ushqimeve.